Mizoram Pradesh Youth Congress Committee (MPYCC) chuan thuchhuah siamin, chief minister Zoramthanga chu rua chauh buaipui lo a, sorkar inrêlbâwl dan buaipui zawk turin an chah.
MPYCC chuan, MNF kaihhruai Mizoram sorkarin MPSC thuneihna aṭanga a laksak tâk group B (non gazetted) post recruitment hnuaia department pathuma hna lak tur - Health and Family Welfare department-a thawk tur staff nurse 25, Home (Forensic)-a thawk tur UDC pakhat leh AH&Vety department-a thawk tur computer operator atana written exam paltlang tawhte chu titangkhang rei lo tur leh rang taka lak chhunzawmtir turin sorkar an phût.
Congress ṭhalaite chuan, June 10,2019-a Mizoram Council of Ministers meeting thutlukna anga MPSC (Limitation of functions) Regulation Amendment, June 21, 2019-a govt. gazette notification vangin group B (non gazetted) post lakna MPSC-in a kalpui chu tihtawp a nih thu an sawi a, "Hei vang hian MPSC pawhin hna lak a kalpui mekte kaltlangpui ngam loin sorkar a ngaichâng a, kaltlangpui zel ngam chi nia a ngaih loh avangin July 22 khan hna lak mek tihtawpna notification a chhuah ta a ni," an ti.
MPYCC chuan, "MZP leh MSU nawrna vangin Chief Minister-in Council of Minister thu pass tawh chu ama thua sâwi ṭhiatin, a ngai anga kaltlangpui leh ni rawh se, a ti a. MPSC lamin legislator-te dan zam sorkar hnathawkina lo tihdanglam chi a ni lo tih an sawi thung si. Hei vang hian Mizoram sorkar leh MPSC inkarah thu a saisa zo ta a ni," an ti a; chu'ngte chu sorkar hotute inthlahdah vanga thleng a nih thu leh Chief Minister chu sorkar inrêlbàwl dan ngaihven tura an duh thu an sawi.
Login to comment
No Comments