ZPM Ṭhalai chairman Malsawmzuala chuan, Mizoram mipuiin hma­sawnna duh vangin beiseina sang tak nen MNF an thlang tling tih sawiin, MNF sorkar erawh chuan khaw êng zah zo loin zirtirtu lakna an kalpui tih a sawi.

Malsawmzuala hian nimin khan an party pisaah thu sawiin, pri­mary school leh middle school zirtirtu 881 lak tur chungchang a sawi a, "MNF party mi leh sa induhsakna uchuak tak a awm dawna ngaih turin sorkar chu khaw êng hmu loin an ár khawthim dai chêt ta mawlh mawlh mai. MTET certificate leh computer proficiency nei lo pawhin an dil theih nan huang an zauh a, written test a ngai lo a, interview chauh hmachhawn turin ruahmanna an siam hi lehkha thiam hna zawng mekte hmuhsitna lian tak a ni," a ti.

ZPM Ṭhalai Chairman chuan, zirlai pawl nawrna vanga zirtirtu lak tura mark pêk dan tur School Education minister Lalchhandama Ralte-in a tidanglam leh thut chu zirlaite leh lehkha thiam hna zawng mekte chhimbudâwi tumnaa an ngaih thu leh, MTET-in mark 10, IQ test-in mark 20 leh khaw mi nihnain mark 20 puttir tura sawi chu mipuiin an interview lai an hmuhpui ve loh chuan rin ngam a har thu a sawi a ni.

Malsawmzuala chuan, "Education system hi kawng chhia, a kum leh lawka siamṭhat theih ang a ni lo a, zirlai sang chuang fé zirtirtu tur kan lak dan a fuh loh chuan, nakin lawka kan ram nghahfâk ni mai turte hma hun kan tichhe thei a ni," a ti bawk.

Share this Post