Vanglaini - NH-54 kawngpui leh a chhehvel endik

KHAWTHLIR

Who's Who-ah Mizo

Republic HSS-a lecturer Lalhmingmawia Ralte chu Rifacimento International, New Delhi-in Asia Pacific Who's Who, 2019 (Volume Seventeenth) a buatsaihah a telh a, phek 336-naah langin, a chanchin tlangpui tarlan a ni. Lalhmingmawia Ralte hian National Award for Teacher pawh a lo dawng tawh a ni.

RMSA-a thawkte'n lawmthu an sawi

Mizoram RMSA Employee Welfare Association (MIREWA) chuan thuchhuah siamin, Centrally sponsored scheme hnuaia School Education department-a thawkte'n mumal zawka hlawh an lak ve theih tâk avangin lawmawm an tih thu an tarlang a, "Education Minister leh a hnuaia thawktute leh Finance-a thawkte chungah lawmthu kan sawi," an ti.

Êng awm dawn lo

Vawiin chawhma dar 10 aṭanga chhun dar 1 inkarah 33KV Tlangnuam Sub-Station-ah hna thawh a ni dawn a, chuvang chuan Aizawla veng

ṭhenkhatin kawlphetha an hmu dawn lo. Power hmu lo tur vengte chu - Tlangnuam, Kulikawn, Thakthing, Mission Veng, Mission Vengthlang, Khatla, Melthum, Saikhamakawn, Hlimen, Lawipu, Maubawk leh Reiek te an ni.

Thisen pe

Sakawrtuichhuna awm Border Security Force (BSF) 90 battalion chuan nimin khan Aizawl Civil Hospital tan thisen unit 23 an pe.

Sorkar ràlna hlan

July 17, 2019 tlaia ṭêk tlain a den hlum, Laldintluangi (33), Dilkawn chhungte hnenah Mizoram sorkarin nimin khan khuarel chhiatnaa thite râlna (ex-gratia) Rs. 4,00,000 a hlan. Ràlna hi Mizoram sorkar aiawhin Champhai District Disaster Management Authority chairman Dr Naveen Aggarwal, district bawrhsapin Laldintluangi pasal Lalramnghinga hnenah a hlân a ni.

Minister-in hawng

Samaritan Association for the Blind-te'n Durtlanga mitdelte hawrawp chhutna kháwl an bun thar, Braille Press chu nimin khan Social Welfare minister Dr K Beichhua'n a hawng. Samaritan Association for Blind hi kum 1990-ah R Thanga hoa din a ni a, May 1, 2001 khan Special Blind School an din a ni.

Damdawi-in endik

National Health Mission team-te chuan nimin khan Champhai District Hospital tlawhin, supportive supervision an nei a; nau neihna leh nau piang hlim enkawlnate tlawhin, staff nurse-te'n record an siam dan leh nau piang hlim an enkawl dante an enfiah. NHM team hi state programme officer Dr Lily Chhakchhuak-in a ho a ni.

Civil Service Drive

Kolasib College-a Public Administration department chuan, nimin khan an college-ah Career Guidance on Civil Service Drive an buatsaih a, resource person MCS officer pahnih - K Zorammuana leh Gaston Vanlalhriatpuia ten civil service exam hmachhawn tura thil pawimawhte an sawi.

DAWNTISEI

NH-54 kawngpui leh a chhehvel endik

Task Force Committee for Removal of Encroachment of NH-54 chuan nimin khan National Highway no. 54 an endik a, NH-54 kawngpui leh a kam vel hmun 235-a an endik hmasak ṭuma an chhiahchhiah tawhahte hmalakna a awm leh awm loh an enfiah.

Task Force Committee hian Chaltlang Lily Veng, Bawngkawn, Chanmari West, Edenthar Veng leh Hunthar Vengahte NH-54 kawngpui leh a kam velte an enfiah.

GIG Motors, motor silna leh workshop vanga motor kawng sira dah te, dawr leh in sakna bungrua kawng kama dah hnawk te, MVI Site Office-a driving licence diltu ṭhahnem ṭhin avanga NH-54 nêkchêp dante an endik a; a mawhphurtute hnenah NH-54 kawngpui a thâwl theih nan hun tiam chhunga hma la turin an hriattir nghal.

Task Force Committee for Removal of Encroachment of NH-54 hian Sairang leh Tuirial inkar an endik chhunzawm dawn a; an hmalakna hi Aizawl khawpui luh chhuahnaa traffic tâwt zualpui tihziaawmna tura hmalakna a ni.

Endiklnaah hian PWD hotu te, PWD Road Protection Squad te, Aizawl DC, IPR, Police leh traffic police aiawhte bakah, kawngpuiin a paltlang local council leh YMA aiawhte an tel.

Share this Post

Login to comment

No Comments