Mizo Academy of Letters (MAL) leh INTACH (Mizoram Chapter) chuan nimin khan MBSE Conference Hall, Aizawlah Mizo ṭobul chhuina, 'Symposium on Chhinlung' an buatsaih a, Art & Culture minister R Lalzirliana'n a hmanpui.

R Lalzirliana chuan, hnam ropui, hlawhtlinna leh hmasawnna kawnga sûlsutu leh mite'n an ngaihsan em emte ropuina innghahna chu an history leh culture nghet tak a nih thu a sawi a, "Culture-in nghet taka a phuar khawm avangin hnamah an chiang a, an rinna thleng pawha vawngin, chu chuan an nihna a tinghet a, hnam anga inpumkhatna a siamsak a ni," a ti.

Art & Culture Minister chuan, Mizote chu thu leh hla hmanga hnam ṭobul leh hmànlai thilte inhlàn chhâwng hnam an nih avang leh ziaka vawn ṭhat an neih loh avangin Mizote chhuah dan tak hriat chian a harsat thu sawiin, "Kan tu leh fate'n chiang taka Mizo nihna an hriatfiah theihna turin kan hnam ṭobul chhuina kawngah tuna mi thiamte hi an pawimawh hle a ni," a ti a; Zofate inlungrualna leh inpumkhatnaah chian a pawimawh ber thu a sawi.

Symposium hi MAL president Prof. Laltluangliana Khiangte-in a kaihruai a, Rev. L Rema leh Dr Remsangpuia te paper buat­saih zirho a ni.

INTACH convener P Ro­hmingthanga, Co-convener C Chawngkunga, historian B Lal-thangliana, Dr Lalnunthangi leh Lalzuia Colney ten thu an sawi bawk.

Share this Post