Nimin kha Mizoram Intodelhna Project (MIP) chungchanga chief minister Zoramthanga thubuai Court-a ngaihtuah hun a ni a, mahse, thuhretute inlan loh avangin ngaihtuah theih a ni lo.

Sorkar ukil R Lalremruata hnen aṭanga Vanglaini thu dawn danin, Zoramthanga thubuaiah hian Special Judge (PC Act) Thanglianmanga chuan nimin khan thuhretu pakhat a ko a, a inlan loh avangin thubuai ngaihtuah hun chu August 14, 2019-ah sawn a ni.

Thubuaiah hian thuhretu 10 chuang an awm a, Court chuan mi pakhat chiah thu a la zawtfiah.

He thubuaiah hian MNF sorkar hmasak laia Agriculture minister H Rammawi leh chief minister adviser Lalhuapzauva-te pawh thubuai siamsak an ni. 

Thubuai ziah luh a nih chhan chu, kum 2008-a MNF sorkarin MIP a kalpuinaah, Agriculture department kaltlanga Mizoram Venus Bamboo Product Pvt. Ltd. hnena cheng nuai 50 leh Champhai leh Hnahlana Grape Grower Society-te hnena cheng nuai 83 ve ve loan hmanga pek vang a ni.

Vigilance department chuan kum 2009 khan Anti Corruption Bureau-ah thubuai chhui phalna a pe a, ACB chuan thubuai chu an chhui zui ta a ni. 

Thubuaiah hian January, 2013 khan ACB-in Court-ah chargesheet an thehlut a, Congress sorkar chhung zawng khan hmalakna mumal a awm lo.

Thuhretute thu zawh fiah vek an nih hnuah Zoramthanga chu thu zawh fiah ve leh a ni ang.

Thubuai hi May 17, 2018 aṭang khan PC Act Court-ah ngaihtuah ṭan a ni a, Zoramthanga hi Indian Penal Code Section 201 leh Prevention of Corruption Act Section 13(2) hmangin thubuai siamsak a ni.

PC Act Section 13(2) hmanga thiam loh chantir a nih chuan kum khat aia tlem lo leh kum sarih thleng jail-a tàntir leh pawisa chawitir theihna a ni a; IPC Section 201 hmanga thiam loh chantir a nih chuan kum hnih thleng jail tàntir theih a ni bawk.

Share this Post