Vanglaini - Nursing zirnaah fimkhur a ngai

KHAWTHLIR

Who's Who-ah Mizo

Republic HSS-a lecturer Lalhmingmawia Ralte chu Rifacimento International, New Delhi-in Asia Pacific Who's Who, 2019 (Volume Seventeenth) a buatsaihah a telh a, phek 336-naah langin, a chanchin tlangpui tarlan a ni. Lalhmingmawia Ralte hian National Award for Teacher pawh a lo dawng tawh a ni.

RMSA-a thawkte'n lawmthu an sawi

Mizoram RMSA Employee Welfare Association (MIREWA) chuan thuchhuah siamin, Centrally sponsored scheme hnuaia School Education department-a thawkte'n mumal zawka hlawh an lak ve theih tâk avangin lawmawm an tih thu an tarlang a, "Education Minister leh a hnuaia thawktute leh Finance-a thawkte chungah lawmthu kan sawi," an ti.

Êng awm dawn lo

Vawiin chawhma dar 10 aṭanga chhun dar 1 inkarah 33KV Tlangnuam Sub-Station-ah hna thawh a ni dawn a, chuvang chuan Aizawla veng

ṭhenkhatin kawlphetha an hmu dawn lo. Power hmu lo tur vengte chu - Tlangnuam, Kulikawn, Thakthing, Mission Veng, Mission Vengthlang, Khatla, Melthum, Saikhamakawn, Hlimen, Lawipu, Maubawk leh Reiek te an ni.

Thisen pe

Sakawrtuichhuna awm Border Security Force (BSF) 90 battalion chuan nimin khan Aizawl Civil Hospital tan thisen unit 23 an pe.

Sorkar ràlna hlan

July 17, 2019 tlaia ṭêk tlain a den hlum, Laldintluangi (33), Dilkawn chhungte hnenah Mizoram sorkarin nimin khan khuarel chhiatnaa thite râlna (ex-gratia) Rs. 4,00,000 a hlan. Ràlna hi Mizoram sorkar aiawhin Champhai District Disaster Management Authority chairman Dr Naveen Aggarwal, district bawrhsapin Laldintluangi pasal Lalramnghinga hnenah a hlân a ni.

Minister-in hawng

Samaritan Association for the Blind-te'n Durtlanga mitdelte hawrawp chhutna kháwl an bun thar, Braille Press chu nimin khan Social Welfare minister Dr K Beichhua'n a hawng. Samaritan Association for Blind hi kum 1990-ah R Thanga hoa din a ni a, May 1, 2001 khan Special Blind School an din a ni.

Damdawi-in endik

National Health Mission team-te chuan nimin khan Champhai District Hospital tlawhin, supportive supervision an nei a; nau neihna leh nau piang hlim enkawlnate tlawhin, staff nurse-te'n record an siam dan leh nau piang hlim an enkawl dante an enfiah. NHM team hi state programme officer Dr Lily Chhakchhuak-in a ho a ni.

Civil Service Drive

Kolasib College-a Public Administration department chuan, nimin khan an college-ah Career Guidance on Civil Service Drive an buatsaih a, resource person MCS officer pahnih - K Zorammuana leh Gaston Vanlalhriatpuia ten civil service exam hmachhawn tura thil pawimawhte an sawi.

DAWNTISEI

Nursing zirnaah fimkhur a ngai

Mizoram Nursing Council (MNC) Registrar chuan thuchhuah siamin nursing zir tumte leh zir mekte hriat tur a tarlang.

Karnataka state-ah Indian Nursing Council (INC) leh state nursing council pawmpui loh nurse zirna-in a awm nual avangin fimkhur a

ṭul thu an puang.

MNC Registrar chuan, INC leh state nursing council pawmpui nursing school/college-ah chauh zir tur a nih thu sawiin, "INC-in Scheme of Examination a siam hrang hrang zawmtu examination board/university zawm institution-ah chauh zir tur a ni," a ti.

MNC hriattirna chuan, nursing chu professional course a nih avangin INC duh danin INC-a inziak lut turin pass mark 50% hmuh ngei a ngaih thu a tarlang a; "Govt. of India leh INC chuan Nurses Registration & Tracking System (NRTS) India ram pumah a kalpui mek a, zir chhuahna state-a NRTS enrolment ti lo chu state dangah inziah luh theih a ni tawh dawn lo," a ti bawk.

Kum 2019-20 session aṭang chuan a chunga an tarlante zâwm lo institution/examination board/university aṭanga nursing course zir chhuak chu INC thu angin MNC-in reciprocal registration a pe thei tawh dawn lo tih an tarlang a, "He mi chungchangah hian a bik takin Karnataka state-ah kan point tarlante zâwm lo institution/examination board/university tam tak a awma a hriat a ni," tiin, Karnataka-a nursing zir tum leh zir mekte chu fimkhur turin an chah.

Share this Post

Login to comment

No Comments