Chief minister Zoramthanga chuan, "MNF hi Pathian leh kan ram tana zalenna thawk chhuak tura sualtute kan ni. Kum 1966-1986 inkar chhung ram leh hnam tan nunna tam tak chánin kan bei a, kan tawrh chhan kha a dik a ni," a ti.

Nimina Ex-Mizo National Army (Ex-MNA) Association-in Chanmari YMA Hall-a General Assembly vawi 10-na an hmanaah thu sawiin Zoramthanga chuan, "MNF kan mawina chu Pathian leh kan ram tan tia thisenin a nemnghehna kha kan chhuan tur neih chhun a ni. Mi sak ve theih loh hla mawi kan neih chu 'Pathian leh kan ram tan' tia kum 20 chhung kan lo beih tawhna chanchin kha a ni," a ti a; prime minister leh mi pawimawh dangte hmua project leh scheme an sawipui ṭum pawhin, ngaihnawm an tih ber chu ram tana an lo thawh tawhna a nih thu a sawi.

MNF President chuan, "MNF chu hnam movement a nih avangin a ziding pawh MNF a ni mai," a ti a, a tawpah hming dang belh leh paih a rem lo tih a sawi. "Kan fel leh ṭhat vangin Pathianin min hruai chhuak lo, a meichher chhi tur leh keng nung tura hnam ka thlan min tih vang a ni. Lalpa'n malsawmna dawhkan retheite kîl phâka buatsaih turin min ruat a, kan ram malsawmna nasa tak lak chhuah kan tum. SEDP aṭanga kawng siamin, ram kan pe dawn che u a, eizawnna ngêlnghet, chhe thei tawh lo tur in neih theih nan theihtawpin kan thawk dawn. Kal tate thisenin min baptist thuthlung hi i kalsan lo ang u," a ti.

Chief minister chuan, zu leh ruihhlo vangin Mizoramin harsatna a tâwk a, kum 2013-2018 inkarah zu zawrh a nih chhungin police 500 chuang leh civil mi 5,000 - 7,000 inkar an thi hman nia sawiin, MNF an sorkar veleh zu zawrh an tihtawp nghal thu a sawi.

Congress party chu kum 2013-ah vote rigging vanga chakah a puh leh a, "Kum 2013 Election-ah rigging avanga MLA seat nga lek min pe phaltu kha, min pek phal chin MLA 5 chiah 2018-ah chuan an nei ve ta a ni," a ti.

Khualzahawm Lalchamliana, Home minister chuan, zalenna sualtute chu inpumkhata induhsak tawn tur an nih thu sawiin, "Zalenna sualtute pawl hrang hranga kan awm hi a rilru natthlak a, iner leh inṭhen hrang thei kan ni lo. Spirit of 1966 kha thinlungah dah thar lehin, hnam thinlungah i kîr ang u. Hnam martar, returnee leh an chhungte tan rei lo teah a taka kan pên chhuah ka beisei. In tan eng emaw tak kan la ti a nih pawhin, Mizo mipuiin min thîk ka ring lo. Kan inunauna leh induhsakna kan karah lo lian zel rawh se," a ti.

Govt. deputy chief whip Lalrintluanga Sailo, MLA pawhin thu sawiin, "Mizo nationalism-ah i kîr leh ang u. Pathian leh kan ram tana kan thawhnaah hian thawk tlem leh thawk tam bik kan awm lo a, huang khata inchhûng khawmin inlungrual vek tur kan ni," a ti.

Rintluanga chuan MNF chu an hotute'n dâwt an hrilh ve ngai lo nia sawiin, "Thil tum leh hmathlir a lo thlen dik vek loh hian dâwt a ni lo. MNF chuan hotu ṭha, hmathlir nei ṭha tak kan ni a, kan vannei hle a ni, " a ti bawk.

Ex-MNA Association Ge­neral Assembly hi an president Rochungnunga'n a kaihruai a, Rev. Vanlalbela'n hunserh a hmang a, resolution pahnih an pass a ni.

Share this Post