Vanglaini - Rotavirus Vaccination pek dan tur sawiho

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Rotavirus Vaccination pek dan tur sawiho

Champhai DC Dr Naveen Aggarwal kaihhruaiin nimin khan Champhai District Task Force for Immunization (DTFI) chu DC pisaah an ṭhukhawm a; naupang kawṭhalo thlentu Rotavirus venna tur Rotavirus Vaccination (RVV), August 2019 chhunga pek tur chungchang leh inpuahchahnate an thlirho.

Meeting-ah hian, RVV kalpui turin Champhai district a inpeih thawkhat tawh thu leh Mizoram huapa hawn a nih ve leh a

ṭul angin an district chhunga damdawi-in - primary health centre (PHC), community health centre (CHC) leh sub-centre-ahte pek chhuah nghal a nih tur thu an tarlang.

DTFI meeting chuan, Champhai district-ah natna 11 vel laka invenna tur vaccine pasarih pek a nih thu leh, ramri kaltlanga natna kai theihte venna turin ramri kân ṭhinte tan Cross Border Polio Vaccination mi 3,000 chuang pek an nih tawh thu a tarlang a; vaccine la thei turte'n a hun takah an lak vek theih nan leh hlawhtling taka vaccination kalpui a nih theih nan a buaipuitute ṭha taka ṭawiawm turin mipui an chah.

Champhai district chhungah kawṭhalo laka invenna vaccine la thei tur naupang 2,123 vel an awm. Vaccine chu ká-a thlawr tur a ni a, nausen, an pian aṭanga chawlhkar rukna, chawlhkar 10-na leh kar 14-naahte pek tur a ni. Damdawiin Champhai a thleng tawh a; RVV kalpui turin Champhai district-a damdawi lam thawktu hrang hrang, doctor, health worker, ASHA anganwadi worker-te training pek an ni tawh.

Rotavirus Vaccination hi sorkar laipui kaltlanga Universal Immunization Programme (UIP) hnuaia hmalakna pakhat a ni a, India rama state 11-ah kalpui ṭan a ni tawh. India ram pumah kum tin nau piang nuai 267 leh nu nau pai nuai 290-te'n vaccine a hun taka an lak theihna tura hmalak a ni. Kum tin Session Plan nuai 90 aia tam neiin, vaccine dahṭhatna leh awlsam taka sem darhna tur cold chain point 27,000 siam a ni bawk.

Rotavirus hi naupang kum 5 hnuai lama kawṭhalo 40% dáwn lai thlentu leh kawṭhalo vanga thihna 14% aia tam mah thlentu a ni a, India ramah kum tin naupang 3,34,000 velin an thih phah ṭhin. RVV hi naupang tan a him a, Oral Polio Vaccine (OPV) 1, OPV 2 leh OPV 3 te nen a ruala pek tur a ni.

Share this Post

Login to comment

No Comments