Vanglaini - B.Ed. result chhuakah zirlai an pass vek

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

B.Ed. result chhuakah zirlai an pass vek

Mizoram University chuan nimin khan kumin June thlaa Bachelor of Education (B.Ed.) 4th semester leh 2nd semester examination result a tichhuak. 4th semester-ah zirlai exam 216-te an pass vek.

B.Ed. final year exam-ah hian grade-A ah zirlai 145 an pass a, grade-B ah zirlai 71 (regular 66 leh repeater 5) an pass a; fail an awm lo. Pass zawng zawng zirlai 211 zinga panga chu repeater an ni.

Institute of Advanced Study in Education (IASE) aṭangin mi 111 an pass a, regular 106 leh repeater panga an ni a; pass mi 211 zinga 95 chu Mizoram University-a School of Education & Humanities hnuaia zirlaite an ni thung.

A ti ṭha zual 10-ah IASE zirlai pakua an lang a, MZU School of Education & Humanities zirlai pakhat a lang. Mizoramah B.Ed zirna pali - MZU (seat 50) IASE (seat 120), DIET Aizawl (seat 50) leh DIET Lunglei (seat 50) a awm mek a; DIET-te hi chuan bul an

ṭanna a la rei loh avangin kuminah 4th semester exam result an la nei thei lo.

Top 10-a langte :

HmingZirna hmun

1. Estherine LalrinmawiiIASE

2. Francis LalruattluangaIASE

3. Lalrintluanga ColneyIASE

4. Laldinsangi RenthleiIASE

5. ZohminglianiIASE

6. C LaldinfeliIASE

7. Esther LalmuanpuiiIASE

8. Lalramdini SailoMZU

9. Lalhriatkimi SailoIASE

10. Lalnunmawii ThlohthangIASE

Share this Post

Login to comment

No Comments