Khuarel chhiatna tuar buh leh thlai chinga eizawngte Chhawmdawlna tur crop insurance siam a ni dawn - Agriculture Minister

Agriculture minister C Lalrinsanga chuan khuarel chhiatna vanga Mizorama buh leh thlai chinga ei zawngte harsatna tawh ṭhin zualpui sutkianna turin Mizoramah crop insurance kalpui a nih tur thu a sawi.

Khawthlangtuipui lianin chhiatna Tla­bung leh a chhehvela a thlen dan nimina enfiahtu C Lalrinsanga chuan Tlabung YMA Runah thu sawiin, "Leilung behchhana eizawngten, khuarel chhiatna vangin hah taka an thawhsa an chán fo. Company aṭanga an buh leh thlai chhiate avanga an chânna hmuh letna turin crop insurance kalpui tum a ni a, mithiam zawkten chak takin an bawhzui mek," a ti. 

Minister chuan Mizoram sorkarin tuilian vanga Tlabung mipuite harsatna tawh a hriatpui thu leh a tawrhpui thu sawiin, "Mizoram sorkarin a hre reng che u a, kan Chief Minister pawhin a ngaipawimawh che u tih min hriatsak ka duh," a ti a, Tlabung hi Chief Minister aiawha tlawh a nih thu a sawi.

Pumpelh theih loh thil chi hrang hrang avangin khuarel chhiatna chu thleng zel thei tih sawiin C Lalrinsanga chuan, "Khuarel chhiatna thleng thei laka inralrin a ṭul," a ti a, Tlabung mipuiten tuilian avanga harsatna an tawrh fo sutkianna tura rawtna leh ruahmanna an neihte thawhkhawm turin khawtlang hruaitute a sawm.

C Lalrinsanga chuan khuarel chhiatna vanga mipuiten harsatna an tawh sukiang turin sorkar hnathawkten mawhphurhna lian tak an neih thu sawiin, "Chumi hlenchhuah chu kan tihmakmawh a ni. Mipuite pawhin kawng hrang hranga sorkar an thawhpui a 

ṭul. Dik leh felfai taka thil tih a nih theih nan sorkar leh mipui ṭha taka an thawhho a ngai a ni," a ti.

Tlabung khawtlang hruaitute chuan Minister hnenah hian harsatna an tawh dan leh an mamawh hrang hrangte an thlen a, Leivung leh thil dang avanga lui mawng sang tial tial chu Khawthlangtuipui len thut ṭhinna chhan nia an hriat thu an sawi.



Share this Post

Login to comment
No Comments