Vanglaini - MLA hlawh zir chiangtu tur Committee din a ni dawn

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

MLA hlawh zir chiangtu tur Committee din a ni dawn

Mizoram Legislative Assembly speaker Lalrinliana Sailo chuan, member of legislative assembly (MLA) hlawh zir chiangtu tur Recommenda-tion Committee din a nih tur thu a sawi.

Vanglaini palai zawhna chhangin Assembly Spea-ker chuan, MLA hluite intêl khawmna, Former Legislature Association of Mizoram (FLAM)-in MLA hlawh tihpun ngenna Chief Minister hnena an thehluh chungchang chu CM nen an sawi dun tawh thu a sawi a, "MLA hlawh zir chiangtu tur Recommendation Committee uluk takin kan din ang a, anni'n rawtna an neihte chu kan thlir leh dawn a ni," a ti.

Lalrinliana Sailo chuan, sorkar hnathawkte'n 7th

Pay an hman tawh thu sawiin, "State dang ngaihtuah chuan Mizoram MLA-te hlawh hi a tlem hle. Mizote hi khawtlang nun inpawh tak kan nih avangin Mizoram MLA-te hi an hah zual. Mizote hi eirukna haw tak kan ni bawk si," a ti a; MLA-te hlawh chu eng zat pawh ni se, mipui hnena lut leh tur tho a nih thu

a sawi.

Tarlan tawh angin, FLAM hruaitute chuan July 17, 2019-a Chief Minister an kawmnaah, Mizoramah khawsak a harsat avangin sum senso a tam bik a, chuvang chuan MLA-te hlawh tipung turin an ngen a ni.

Share this Post

Login to comment

No Comments