Chief minister Zoramthanga chuan nimin khan Mizo Hnam Rûna inkhawmah thu a sawi a; ramri buai chu a chinfel dan tur strategy felfai tak an nei a, mahse, puanzar mai chi a ni lo tih sawiin, "Ramri hi a sawia sawi fel chi a ni lo a, a tiha tihfel chi a ni," a ti.

Assam aṭanga chhuak state zawng zawngin ramri buai an neih vek thu sawiin CM Zoramthanga chuan, "Assam chief minister Tarun Gogoi nen pawh ramri chingfel chungchang kan lo sawi dun tawh a ni. Gogoi  chuan kan ngaihdan a inan dawn loh thu a sawi a, 'Central hnena boundary commission rawn din rawn u ti ila, an rawn ti awl khawp ang. Tu state pawhin an rawtna pawm erawh thu delhkilhah an nei ang' a ti a ni," a ti a; state pahnih pawm tlân theih ramri siamfel chu thil harsa tak a nih thu a sawi.

Zoramthanga chuan, ramri chu sawi fel chi a ni lo a, tihfel chi a nih thu sawiin, "Kan tihfel dan tur kan sawi duh rih lo. Kan thil tumte kan khingpui turte hrilh ta ila, an lo inring dawn. Ram neitute hian a ṭul angin ngaihdan kan nei mek. Ramri buai chingfel tur hian hmanhmawh phut phut chi pawh a ni lo. Silchar lam kan supply tinreng min hrêktute tel loa awm theihna tura hmun dang dang aṭanga kaltlang theihnate siam fel hmasak phawt a ngai," a ti.

MNF President chuan Congress party chungchang sawiin, "Tunah chuan Congress-in India ramah president pawh an nei lo a, hmannia an ruat pawh kha, a ruattu tu nge ni tiin an sawisel luai luai a ni. Congress tel lo India an tih chu tunah India ramah a thleng mek a, Goa leh Karnataka pawh an buaina a kâng kai zel. MNF chu Pathianin min hruai zel a, lei chárah pawh ngun taka ka hniakhnung entu chuan a chhui thei ang," a ti a; Mizoramah pawh kum 2013 Congress sorkar chu chhiatna tinrengin a bawm thu a sawi.

MNF inkhawm hi MNF treasurer Vanlalzawma'n a kaihruai a, MNF President hian MNF 'Dan bu' a tlangzarh nghal.  Zoramthanga sawi danin, MNF Dan bu neih hmasak chu a rei tawh avangin, High Command-in siamṭhat dan tur an rêl a, National Council-in a pawmpui thlap hnuah an tlangzarh a ni.

Share this Post