Vanglaini - Brig. T Sailo hming daih kan phal dawn lo

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Brig. T Sailo hming daih kan phal dawn lo - ZPM Leader

ZPM chuan nimin khan an pisaah Election Commission of India (ECI)-a registration an neih an lâwm. ZPM Leader Lalduhoma chuan thu sawiin, MPC founder president Brig. Ṭhenphunga Sailo (L) hming a daih an phal dawn lo tih sawiin, "A policy duante kha kan policy laimu a ni reng dawn," a ti.

Lalduhoma chuan, Brig. T Sailo vei em em - intodelh leh six basic need tipuitling turin hma an lak zel tur thu sawiin, "Hetiang a lo nih taka chuan MPC unau, kha leh chen kan thawhpuite zawng zawng khan ZPM dintu leh neitu an nih inhria a, ZPM zawmna lehkha rawn thehlut sup sup turin kan insáwmin kan inngen a ni," a ti a; MPC chu ṭhian ṭhaah an ngaih zui zel tur thu a sawi.

ZPM-a tel pawl hrang hrangte chu kum 2017 leh 2019-ah party pakhata infin an remtih leh remtih loh an inzawh thu sawiin Lalduhoma chuan, "MPC unaute erawh chuan thu mûm an nei thei lo. Kumin June thla khan reminder kan thawn leh a, an chhanna kan nghah laiin, press conference koin ZPM-a tel an tum loh thu min puan hnan a ni," a ti.

ZPM Leader sawi danin, MPC-te'n press conference an koh hnuah pawh ZPM senior vice chairman F Rodingliana chu MPC President inah lêngin, ZPM-a tel ve tura ngenna a pe nawn leh a, hmaichhanah a sawipui nghal bawk. Mahse, MPC President chuan, ZPM-a tel an tum loh thu chiang takin a sawi a ni.

ZPM Legislature Party leader Lalduhoma chuan, ZPM MLA-te chu anmahni thlang tlingtu ZPM mipuite an phatsan a thiang lo tih sawiin, "Kan thutiam ang ngeiin ZPM Legislature Party-ah kan awm a, kan awm zel dawn a ni tih min lo hriatpui dawn nia. Tunlaia ZPM MLA-te party danga pakai mai tur anga thuthang a awm a, sorkar tura min ngaitute'n min huphurh vanga an phuahchawp a ni," a ti.

ZPM leader dang K Sapdanga pawhin thu sawiin, kalphung thar, sorkar ṭha din tum an nih avangin harsatna hrang hrang an tâwk tih a sawi a, "ZPM party lo piang ta hi political party dang ṭhenkhatte'n min helh tâwk a tling," a ti a; ZPM chu Mizoram mipui nghahfâk an nih thu a sawi.

K Sapdanga hian ZPM-in Election Commission of India registration nei tura an hmalakna hrang hrang leh harsatna hrang hrang awmte paltlanga registration an neih theih dan a sawifiah a ni.

ZPM inkhawm hi ZPM senior vice chairman Kenneth Chawngliana'n a kaihruai a, PAC member Lalmuanpuia Punte pawhin thu a sawi.

Share this Post

Login to comment

No Comments