Vanglaini - MBBS leh BDS atan counselling ṭan a la ni lo

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

MBBS leh BDS atan counselling ṭan a la ni lo

National Eligibility cum Entrance Test (NEET) kaltlanga Mizoram quota-a medical course MBBS leh BDS zir turte tan counselling buatsaih ṭan a la ni lo. Higher & Technical Education (HTE) department chuan sorkarah MBBS leh BDS zir tur atan tute nge an thlan dawn tih an zawt chiang mek.

HTE department hotute hnen aṭanga Vanglaini thu dawn danin, HTE department chuan MBBS leh BDS zir tur atan tute nge an thlan ang tih sorkarah an zawt a, chhanna an la dawng lo. MBBS leh BDS-a Mizoramin seat a neihte chu zirlaite'n an tih ṭhat dan indawtin an thlang

ṭhin a, mahse, tute nge an thlan tur sorkara zawh chu kal dan pangngai a ni.

Sorkar aṭanga chhanna an hmuh veleh HTE (Technical Wing) chuan counselling buatsaih an tum. Counselling-ah hian NEET-a an tih ṭhat dan indawtin zirlaite chu koh an ni ṭhin a, Mizoramin MBBS leh BDS seat a neiha an duh medical college an thlang ṭhin. NEET-a tlingte HTE (Technical Wing)-a an inhriattir hun a tawp tawh.

Hetih lai hian, Mizoramin MBBS leh BDS seat a neihna NEIGRIHMS, Shillong-ah chuan July 24, 2019 hian admission tih hun a tawp dawn a; RIIMS, Imphal-ah pawh July 25-ah admission tih hun a tawp dawn.

MBBS leh BDS zir tur thlanna atan hian eng dan (rules) nge hman a nih dawn tihah pawh thutlukna mumal tak a la awm lo a, HTE (Technical Wing) chuan Council of Ministers thutlukna angin rules an hmang mai turah an inngai.

Council of Ministers chuan, The Mizoram (Selection of Candidates for Higher Technical Courses) Rules, 2016-a Category-I a dil theite 'Indigenous people' tiha inziak chu 'Zo ethnic' bak Mizoramah 'Indigenous people' an awm loh avangin 'Zo ethnic' pual atan an dah. Cabinet thutlukna ang chuan category-I ah Chakma-te an tel lo tura ngaih a ni.

Cabinet-in thutlukna a siam hnuah Supreme Court chuan The Mizoram (Selection of Candidates for Higher Technical Courses) Rules, 2016 chungchangah thutlukna a siam a; Mizoram sorkarin Gauhati High Court thutlukna a khinna chu a hnâwl avangin, High Court thutlukna chu thu ding lai a ni.

Gauhati High Court chuan, technical course zir tur thlanna rules-a Category-I a Chakma-te dah an ni lo chu ṭha a ti lo a, tribal ṭheuh ṭheuh

angkhata en turin thutlukna a siam. Thutlukna ang chuan Category-I ah Chakma-te dah an ngai tihna a ni.

NEET 2019 hi Mizoram aṭangin mi 977-in an hmachhawn a, chung zinga 595 chuan qualifying mark an hmu pha a, a tling zinga mi 15 chu hnam dang an ni. Hriat theih chinah, Mizoramin MBBS seat 84 a nei a, central pool-a seat awm zat tur hriat a la ni lo. MBBS seat nei tur hriat theih chinah 70 chu Zoram Medical College-ah a ni a, a bak chu NEC hnuaiah a ni.

BDS-ah pawh central pool hnuaia seat neih tur zat hriat theih a la ni lo a, NEC hnuaiah chuan seat pasarih hmuh a ni.

Share this Post

Login to comment

No Comments