Vanglaini - MPSC-in Group B an la tawh dawn lo Personal interview hmabak pawh an cancel

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

MPSC-in Group B an la tawh dawn lo Personal interview hmabak pawh an cancel

Mizoram Public Service Commission (MPSC) chuan nimin khan public notice chhuahin, MPSC (Limitation of Functions) Regulations, 1994 siamṭhat angin Group B (non gazetted) post-te chu regulation tihdanglamna gazette chhuah ni aṭanga MPSC lak tur a nih tawh loh avangin hnaruak hnawhkhahna tura hna an lak mek chu tihtawp a nih thu an tarlang. Gazette hi ni 21.6.2019 khan chhuah a ni.

MPSC-in hna lak an kalpui mek an tihtawp zingah hian personal interview chiah hmabak tawhte pawh an tel a, chungte chu - ni 23.7.2019 a interview tur Home (Forensic) hnuaia UDC tur te, ni 24.7.2019 a interview tur AH & Vety dept. hnuaia computer operator turte leh ni 8-9.8.2019 a interview tur Health dept. hnuaia staff nurse turte an ni.

Tarlan tawh angin June 10, 2019-a Council of Minister ṭhukhawm chuan MPSC kaltlanga hna lak tam lutuk chhâwk zângkhaina atan leh an hna lak leh thawh turte a hun tak zela an lak theihna atan Group-B (non-gazetted) recruitment chu MPSC mawhphurhna aṭanga lak chhuah an rêl a; MPSC aṭanga lak chhuahte khawih turin Mizoram Subordinate Services Selection Board din an rél a ni.

Thudawn danin, staff nurse post 25 lakna tura interview tura tlingte chu hna lak tur cancel a nih thu nimin khan MPSC-a thawkte'n an hrilh kual.

MPSC-in Health & Family Welfare department-a thawk tur staff nurse lakna a kalpui mek atan hian nikum chawhma lam khan advertisement chhuah a ni a, May 30-31, 2019 chhung khan written examination neih niin, nurse 483 an inlan. Written exam result chu July 19, 2019 khan a chhuak a, personal interview hmachhawn turin mi 50 an tling.

Personal interview chu August 8-9, 2019 chhunga neih turin MPSC chuan a ruahman. Interview turin written exam paltlangte chu an inbuatsaih mek laiin, nimin khan MPSC-in staff nurse tur lakna a kalpui mek chu Mizoram sorkarin titawpin, a lak let vek thu an dawng a ni.

Personal interview hmachhawn tura tlingte chuan, staff nurse-a tling tura hun rei tak an inbuatsaihna leh an thawhrimnate chu a thlâwn mai ang tih an hlauhthawn thu an sawi a; MPSC hotute an zawhfiahnaah, MPSC hotute'n sawi theih an neih vak loh thu leh, an kal zel dan tur chu sorkar thu thu a nih tawh thu an lo hrilh tih an sawi bawk.

Share this Post

Login to comment

No Comments