Mipui nghahhlelh; Mizo TV Series 0389 chu kan nghak chhuak dawn ta. A Believing.is.Seeing projek leh Zonet 

ṭangkawpin an buatsaih 0389 hi zanin dar 8:00 hian Zonet Zawlbukah a en theih tawh dawn.

Zirtawp zan apiangin chhuah ṭhin a ni ang a, Zonet Zawlbuk bakah Bawhbel channel-ah chhuah nawn a ni leh 

ṭhin dawn bawk. Mizo-ten kan la hmuh ngai zen zen loh TV Series hmuh tur a awm hi a lawmawm a; en pawh a chakawm tawh hle. A trailer aṭang ringawt pawhin a hmuhnawmin a changkang dawn tih a hriat theih a, film dangdai tak a ni dawn tih pawh a hriat nghal. 

February thlaa bul ṭan tawh kha a ni a, thla nga zet a liam hnuah mipuiten kan en thei dawn ta a ni.

Season khatah hian episode 12 a awm a, senso zawng zawng hi Zonet lam tum vek a ni thung. Script hi Raymond Colney leh Steven Ralte-te ziah a ni a, Zonet nen hian season khat contract an ziak phawt a ni.

Eng lam hawi 

nge ni dawn?

He series hi hybrid genre a ni a; crime leh psycho­logical thriller lam hawi a ni. Entir nei ṭha leh kawhhmuh nei lam erawh a ni lem lo a, entuten hmuhnawm an tih tura siam a ni ber. A Believing.is.Seeing projek lam chuan mi tu emaw, eng emaw hunlaia a thil tawn tarlanna a nih ber thu Vanglaini an hrilh.

A Believing.is.Seeing 

projek thukhawchang 

He serial puitlin a nih theih­na tura tha leh zung sengtu chu Believing.is.Seeing projek-te hi an ni.

"Film siam hi thil awlsam a ni lo tih chu kan hre ṭheuh ang a, thil phuahchawp mai mai, a entu turte awih tir kha kan tum a nih avangin ngaihtuahna sen hnem a ngai hle. Zonet Cable TV-ten film lama Mizoten hma kan sawn theih nan ti a he project an ngaihtuah chhuak hi a ropui ka ti a, filmmaking lama tuite leh lo la tui zel turte tana eizawnna tlaka siam chhoh kan rilruk avangin sum senso hi a tam em em a ni," tiin Raymond, Producer leh Director ni bawk chuan Vanglaini a hrilh.

Mizote hian mahni pual TV series en tur kan nei lo chu veiin anni hian sum tam tak sengin 0389 hi an puitlin a ni. Mipuite pawhin kan hlut thiam a pawimawh hle ang.

An channa hmun

Aizawl hmun hrang hrangah an chang a, Ebenezer Hospital, LRM Hospital, Myrtle's Cafe, Art Novelty-te chu an channa hmun ber niin, Durtlang lam­ah pawh scene eng emaw zat chu an chang bawk.

0389 awmzia

0389 hi kan hriat 

ṭheuh angin Aizawl pin code a ni a, Aizawla thil thleng behchhana siam a nih avangin 0389 tih hi a serial hmingah an hmang.

A changtute lam

He serial-ah hian a chang­tunu ber hi Christina Pautu a ni a, tunge a nih sawi nawn a ngai lo ang. Ani bakah hian Vanlaltlansaa, Mali, Rinhlui Pialtu, Alice Rintluangi leh R. Lal­rem­ruata-te an chang bawk. Zanin aṭangin eng ang chiahin nge role an play kan en thei tawh ang.

Christina Pautu chuan a script a chhiar phat 

aṭang khan ngaihnawm a tih thu leh, a phur tawh thu Vanglaini a hrilh. 

Share this Post