Vanglaini - One Piece Live-Action Series kan hmu dawn?

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

One Piece Live-Action Series kan hmu dawn?

Anime fan-te tan chuan thu lawmawm tak a ni ngei ang. Japan Anime series kum 20 chuang chhuah tawh 'One Piece' chu a live-action series kan hmu dawn a nih hmel a, a script ziaktu tur pawh Matt Owens a nih thu Shonen Jump magazine issue thar berah an tarlang.

Matt Owens hi Agents of S.H.I.E.L.D, Luke Cage leh The Defenders script-te pawh lo ziak tawhtu a ni a, a kuthnu hian beisei a pha ang em tih chu fan-te hriatchak a ni ngei ang.

Owen chuan One Piece story chu a ngainat tak a nih thu a sawi a, a siamtupa Oda-a'n a ring ngam chu lawmawm a tih thu a sawi. A script a ziah tur pawh chu fan-te tilawmtu leh fan dang siam belhtu tur a nih ngei a beisei thu a sawi bawk.

One Piece siamchhuaktu Eiichiro Oda chuan 2017-ah daih tawh khan live action film siam a ni dawn tih a lo sawi tawh a, a tak ram a chang tawh dawn niin a lang.

One Piece chu?

One Piece hi July 22, 1997 aṭanga vawiin thleng hian kartin Pathianni apiangin episode thar tihchhuah a la ni ziah a, episode 900 dawn a awm tawh.

Pirate naupang tak Monkey D Luffy-a'n pirate king nih tuma a zinkawng chanchin a ni a, Mizo naupang leh ṭhalaite zingah entu an tam hle.

Khawvel puma Manga series hralh hnem ber a ni a, copy maktaduai 430 chuang zet hralh a ni tawh. Nikum thleng pawh khan Manga hralh kal ber a la ni reng.

Share this Post

Login to comment

No Comments