Vanglaini - Troll tute chhan let vangin Ariel Winter a inchhir

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Troll tute chhan let vangin Ariel Winter a inchhir

Modern Family star, Ariel Winter chuan US Weekly-in a kawmnaah amah troll tute a chhanlet avanga a inchhir thu a sawi.

Kum 21 mi, Winter chuan troll tute chu chhan let loh hram a tum ṭhin tih a sawi. Mahse troll tu zinga ṭhenkhat chu alo chhan let thu sawiin, a hnuah a inchhir a ni. "Hei hi thil atthlak tak, thil ṭul lo tak a ni, tiin ka ngaihtuah leh a ni," a ti. Mi troll ṭhinte chuan inhnialna chawh chhuahpui a, chhan let tir chu an tum ber a ni tih a sawi. A fan pakhatin positive comment aia negative comment a chhang let nasa zawk tih a hrilh aṭangin a inngaihtuah chhuak tih a sawi a, hei vang hian negative comment lam chu theihnghilh a, amah thlawptute avanga a lawm thu lantir zel zawk chu a tum tih a sawi a ni.

Share this Post

Login to comment

No Comments