Vanglaini - Bollywood Satte Pe Satta film siam thar turah Hrithik leh Katrina

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Bollywood Satte Pe Satta film siam thar turah Hrithik leh Katrina

Farah Khan chuan Amitabh Bachchan leh Hema Malini-te channa, 1982 comedy Satte Pe Satta a siam thar leh dawn a, he film-ah hian Hrithik Roshan leh Katrina Kaif-te an chang dun ngei dawn nia hriat a ni.

Satte Pe Satta film thara chang tur hian ngaihven a hlawh a, star lar tak takte hming pawh sawirik a ni fo. Shah Rukh Khan chu Bachchan role-ah a chang dawn nia sawi thawm awm mah se, a changtu atan hian Hrithik Rohsan tihfel a ni tawh nia sawi a ni. Hmeichhe lam lead role chang tur pawhin Deepika Pudukone hming pawh a lang a, mahse report hnuhnung berah Katrina Kaif chu tihfel a ni tawh a, amah pawh a phur hle.

Hrithik leh Katrina-te hi an film chandun pathumna a ni dawn a, a hmain Bang Bang leh Zindagi Na Milegi Dobara-ahte an lo chang dun tawh a ni.

Share this Post

Login to comment

No Comments