Karnataka-a Congress-Janata (Secular) ṭangrual sorkar paihthlak a nih hnuah sorkar thar a la ding lo a, nimin khan state Bharatiya Janata Party (BJP) hruaitute chuan sorkar thar siam tur sawipuiin Delhi-ah BJP president Amit Shah an hmu. 

Thawhlehni zana sorkar fiahnaah Congress-JD(S) chuan vote 99 a hmuh laiin BJP chuan vote 105 a hmu thung. Hetihlai hian BJP hian sorkar thar siam tumin governor an la hmu lo a, hemi hma hian legislature party meeting neih a, Yeddyurappa chu chief minister a nih theihna tura leader atana thlan phawt an tum. 

Chief minister term thum lo chelh tawh, Yeddyurappa hi BJP-in CM atan kum a bithliah, kum 75 pel tawh mah se, Karnataka CM thar a nih ngei rin a ni thung.

Karnataka BJP hruaitute chuan an state chhung politics dinhmunte sawipui turin Amit Shah leh BJP working president JP Nadda an hmuh thu leh, BJP sorkar din dan turte pawh an sawiho nghal thu an sawi. Tlai lamah an inhmukhawm leh bawk a, hemi hnu hian Parliamentary Board meeting-ah thutlukna siam a ni ang. 

Member 224 awmna Karnataka Assembly-ah hian majority nei tur chuan member 105 neih a ngai dawn a ni. BJP hian  independent member pahnihte thlawpna nen member 107 a nei mek a, Bahujan Samaj Party MLA awmchhun pawhin a thlawp rin a ni bawk. 

Share this Post