Karnataka assembly speaker KR Ramesh chuan Congress MLA helte chu vawiin hian amah hmu turin a ko. 

Rorellai, Congress-Janata Dal (Secular) 

ṭangrual sorkar chuan MLA hel, speaker hnena banna thehlutte hi disqualify turin speaker hnenah hian ngenna an thlen a ni. 

Ṭangrual sorkara MLA 16, Congress MLA 13 leh JD(S) MLA pathumten kar hnih liam taa banna an thehluh avangin Karnataka sorkar hi a buai chho hle. MLA hel zinga pakhat erawh chuan Congress lamah a kir leh tur thu a sawi. 

Karnataka sorkar fiahna hi kar kal ta Ningani khan neih tura tih a ni a, Governor Vajubhai Vala'n deadline ṭum hnih a siamsak chung pawhin vote lak a ni lo. MLA hel zinga pahnihten Supreme Court-a floor test nei tura ngenna an thehluh chu court chuan a ngaihtuah duh ri lo a, Karnataka speaker hnenah pawh floor test nei turin a ti duh lo a ni. 

Nimin khan floor test hi neih leh tum ni mah se vote la lo bawkin inkhawm tihtawp a ni. Floor test neih hun tur hi hriatchian theih a ni lo a, Nilaini-ah neih a ni maithei tia sawi a ni. 

MLA eng emaw zatin an phatsan avangin sorkar chuan thlawptu a ngah tawk em tih fiah thuai turin eptu party, BJP chuan a nawr reng a ni. BJP chuan chief minister HD Kumaraswamy chu Supreme Court lamin a chhan theih beiseiin vote lak tur chu a tikhawtlai zel niin an puh. 

CM chuan thuneihna an chân hlauh vanga debate neih rawt leh, vote lak hun tikhawtlai nia puhna chu a dik lo tih a sawi. A tum ber chu ram pumin BJP nihna dik tak, democracy leh constitution innghahna tihkhawloh an tum dan an hmuhchian theihna atana debate neih phawt a ni tih a sawi. 

MLA helte hi banna an thehluh aṭangin Mumbai-ah an la khawsa a, eng kawng mahin assembly inkhawmah tel an tum lo tih an sawi a ni. 

Share this Post