Vanglaini - Chandrayaan-2 hlawhtling takin kapchhuak

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Chandrayaan-2 hlawhtling takin kapchhuak

Indian Space Research Organisation (ISRO) chuan nimin khan hun rei tak ata tawha project liana an neih, Chandrayaan-2 chu hlawhtling takin an kapchhuak.

July 15-a kahchhuah tura tih tawh kha a ni a, mahse kahchhuah hma lawk darkar khat vel lek a la awm tihah khan a khawl lamah fel lo a awm tih hriatchhuah a ni a, kahchhuah tur chu ṭhulh a ni.

July 16-ah khan a khawl lama fel lo awm chu hriatchhuah nghal a ni a, siam-

ṭhat a nih hnuah nimin khan Andra Pradesh-a Sriharikota aṭangin an kapchhuak ta a ni. Chandrayaan-2 hi ISRO Moon mission pahnihna a ni bawk.

Chandrayaan 2 kalkawng

Nimin tlai dar 3-ah khan Chandrayaan-2 phurtu GSLV-MkIII chu hlawhtling takin kahchhuah a ni a, kahchhuah a nih aṭanga minute 16 hnuah Chandrayaan-2 hi GSLV-MkIII nen an inṭhen hrang. An inṭhen hran aṭanga minute khat hnu lekah hian geostationary orbit a thleng a, hetah hian ISRO chief K Sivan chuan Chandrayaan-2 chu hlawhtling taka kahchhuah a nih thu a puang.

GSLV-MkIII hian hlawhtling takin Chandrayaan-2 hi khawvel orbit-ah a dah a, hemi hnu hian thla(moon) a pan ang.

Thla chhim tawp lamah

Chandrayaan-2 hi thla south pole lam pana kahchhuah a ni a, USA, USSR leh China-te pawhin Moon mission hi kalpui tawh mah se a chhim tawp lamah hian mission kalpui a la ni ngai lo. India hi thla south pole lama inkapchhuak hmasa ber a ni a, hei hi Chandrayaan-2 danglamna chu a ni.

Ni 48 hnuah a thleng dawn

Chandrayaan-2 hian ni 48 hnu, September 7-ah thla hi a thleng dawn a, ni 14-15 vel thlaah hian a cham dawn a ni.

Ram hruaituten

lawmpuina an hlan

Prime minister Narendra Modi chuan a twitter-ah Chandrayaan-2 chuan Indian zawng zawng a tihlawm tur thu sawiin, kahchhuah a ni chu hun chhinchhiah tlak tak a nih thu a sawi.

Defence minister Rajnath Singh pawhin ISRO scientist-te chu a lawmpui thu sawiin India space history-a bung thar pawimawh tak a nih thu a sawi. Ram pumin scientist-te leh team ISRO-te chu a chhuang a ni, a ti.

Eng nge a phurh?

Chandrayaan 2-ah hian lander 'Vikram' tia sawi chu dah a ni a, hei bakah hian ke paruk nei lirthei- rover 'Pragyan' chu dah a ni bawk a, an pahnih rih zawng hi kg 1,471 zet a ni.

Vikram hian solar power 650W thleng a siamchhuak thei a, Indian Deep Space Network, orbiter leh rover-te hi a be pawp thei reng a ni. Camera, seismometer, thermal profiler, Langmuir probe leh NASA-supplied laser retroreflector-te a keng tel.

Pragyan hi solar power 50W hmanga tlan thei a ni a, 1cm/s-a chaka tlanin metre 500 thleng a tlan thei a, lander hi a bepawp thei bawk.

Senso

Chandrayaan-2 atana senso zawng zawng hi cheng vaibelchhe 978 vel zet nia tarlan a ni. Space segment atan cheng vaibelchhe 603 leh GSLV Mk III atan cheng vaibelchhe 375 sen nia tarlan a ni.

Share this Post

Login to comment

No Comments