Vanglaini - NKorea-in missile enchhin leh

KHAWTHLIR

Who's Who-ah Mizo

Republic HSS-a lecturer Lalhmingmawia Ralte chu Rifacimento International, New Delhi-in Asia Pacific Who's Who, 2019 (Volume Seventeenth) a buatsaihah a telh a, phek 336-naah langin, a chanchin tlangpui tarlan a ni. Lalhmingmawia Ralte hian National Award for Teacher pawh a lo dawng tawh a ni.

RMSA-a thawkte'n lawmthu an sawi

Mizoram RMSA Employee Welfare Association (MIREWA) chuan thuchhuah siamin, Centrally sponsored scheme hnuaia School Education department-a thawkte'n mumal zawka hlawh an lak ve theih tâk avangin lawmawm an tih thu an tarlang a, "Education Minister leh a hnuaia thawktute leh Finance-a thawkte chungah lawmthu kan sawi," an ti.

Êng awm dawn lo

Vawiin chawhma dar 10 aṭanga chhun dar 1 inkarah 33KV Tlangnuam Sub-Station-ah hna thawh a ni dawn a, chuvang chuan Aizawla veng

ṭhenkhatin kawlphetha an hmu dawn lo. Power hmu lo tur vengte chu - Tlangnuam, Kulikawn, Thakthing, Mission Veng, Mission Vengthlang, Khatla, Melthum, Saikhamakawn, Hlimen, Lawipu, Maubawk leh Reiek te an ni.

Thisen pe

Sakawrtuichhuna awm Border Security Force (BSF) 90 battalion chuan nimin khan Aizawl Civil Hospital tan thisen unit 23 an pe.

Sorkar ràlna hlan

July 17, 2019 tlaia ṭêk tlain a den hlum, Laldintluangi (33), Dilkawn chhungte hnenah Mizoram sorkarin nimin khan khuarel chhiatnaa thite râlna (ex-gratia) Rs. 4,00,000 a hlan. Ràlna hi Mizoram sorkar aiawhin Champhai District Disaster Management Authority chairman Dr Naveen Aggarwal, district bawrhsapin Laldintluangi pasal Lalramnghinga hnenah a hlân a ni.

Minister-in hawng

Samaritan Association for the Blind-te'n Durtlanga mitdelte hawrawp chhutna kháwl an bun thar, Braille Press chu nimin khan Social Welfare minister Dr K Beichhua'n a hawng. Samaritan Association for Blind hi kum 1990-ah R Thanga hoa din a ni a, May 1, 2001 khan Special Blind School an din a ni.

Damdawi-in endik

National Health Mission team-te chuan nimin khan Champhai District Hospital tlawhin, supportive supervision an nei a; nau neihna leh nau piang hlim enkawlnate tlawhin, staff nurse-te'n record an siam dan leh nau piang hlim an enkawl dante an enfiah. NHM team hi state programme officer Dr Lily Chhakchhuak-in a ho a ni.

Civil Service Drive

Kolasib College-a Public Administration department chuan, nimin khan an college-ah Career Guidance on Civil Service Drive an buatsaih a, resource person MCS officer pahnih - K Zorammuana leh Gaston Vanlalhriatpuia ten civil service exam hmachhawn tura thil pawimawhte an sawi.

DAWNTISEI

NKorea-in missile enchhin leh

North Korea chuan nimin khan an ram khawchhak lamah short-range missile pahnih a enchhin leh niin South Korea sipaite chuan an sawi. Hei hi NKorea hotu Kim Jong-un leh US president Donald Trump-ten nuclear ralthuam tibo tura inbiakna neih leh an remtih hnua NKorea-in missile a enchhin lehna hmasa ber a ni.

South Korea defence ministry official chuan missile hi NKorea khawchhak lam, Wonsan ah enchhin a ni tih a sawi. East Sea-a a tlak hmain km 430-a thui a thlawk hman a, km 50-a sang thleng a thlawk hman a ni. Hetiang thil hi ti tawh lo turin NKorea a ngen nghal a; an inkar boruak siamṭha tura an beih mekah he thil hian a pui dawn lo hle a ni, a ti.

Japan defence ministry chuan, "NKorea missile kahchhuah hian Japan exclusive economic zone a thleng lo a, security tan a hlauhawm phak lo," a ti.

South Korea Joint Chiefs of Staff (JCS) chuan nimina NKorea missile enchhin hi US leh South Korea intelligence official-ten an zirchian hnuah, missile pakhat zawk chu a chi thar a nih thu

a sawi.

Kumin June thla khan Kim Jong-un leh Donald Trump te chu Korea ram pahnih ṭhentu, demilitarised zone-ah an inhmu a, DMZ a nuclear ralthuam tihbo dan chungchang ngaihtuaha inbiakna neih chhunzawm pawh an lo remti tawh a ni. Hemi hnu hian US Secretary of State Mike Pompeo chuan hruaitu pahnihte hian July thlaah inbiakna hi an ṭan maithei tih a sawi a ni.

Share this Post

Login to comment

No Comments