Britain prime minister thar, Boris Johnson chuan a cabinet minister turte a ruat fel nghal. 

Theresa May chu Nilaini tlai khan Britain PM aṭangin a bang a, hemi  hnu hian Queen Elizabeth II chuan Buckingham Palace-ah Conservative Party hruaitu atan thlan thar, Boris Johnson chu prime minister thar atana a ruat zui nghal a ni. 

Kum 55 mi, Johnson chuan Nilaini zan vek khan a cabinet thar turte a puang nghal a; PM kalchhuak May-i hnuaia minister zahve aia tam chu an tel zui tawh lo. Chanvo pawimawh zualte chu Brexit thlawptute a pe a ni. 

PM Johnson chuan a cabinet-te hmaa thu sawiin, hmabak hautak tak an hmachhawn dawn a ni. European Union aṭanga Britain inlakhran thlawptu a ni a, Brexit kalpuina turin inremna kawng dang a zawng leh dawn, a ti. EU nen an inlakchhuahna tur withdrawal agreement an siam thei lo a nih pawhin, October 31 ah chuan eng kawng pawhin EU chu an chhuahsan dawn tih a lo sawi

tawh bawk. 

A tira inremna an siam ang chuan EU aṭanga an inlakchhuah huntur hi March 29 ah ruat a ni a, mahse Theresa May leh EU-in inlakchhuahna tura inremna an siam, withdrawal agreement chu MP-ten ṭum thum zet an hnawlsak. Hei vang hian EU chhuahsan hun tur pawh hi October 31 ah sawn hlat a ni leh ta a ni. 

Kum 2016 June thlaa EU 

aṭanga inlakchhuah duh leh duh loh chungchanga Britain mipuite ngaihdan lakah, vote thlak zinga 52% chuan EU chhuahsan 

hi an duh. 

Share this Post