Vanglaini - UN nuclear watchdog hotu a thi

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

UN nuclear watchdog hotu a thi

United Nations nuclear watchdog, International Atomic Energy Agency (IAEA) Director General Yukiya Amano chu nimin khan kum 72 mi niin a thi.

Japanese diplomat Yukiya Amano hian IAEA director general hna hi kum 2009 khan a chelh ṭan a, kum li term niin a term thumna a chelh mek a ni. A term hi kum 2021, November 30-a tawp tur ni mah se March thla khan a hna hi chawlhsan turin a inbuatsaih ṭan tawh a, nimin khan a chawlh tum thu hi puan a tum nia sawi a ni.

IAEA chuan nikum September thla khan Amano hi a dam ṭhat tawk loh vangin enkawl a nih thu a lo sawi tawh a, mahse eng natna ber nge tih erawh sawilan a ni lo. Hemi hnu hian mipui hmuhah pawh a inlan khat a, a inlan chhunah pawh a taksa a chak tawk lo hle tih a hriat theih.

Amano thlaktu ruat hun tur hi siam a la ni lo a, mahse ban a tum thu hriat lawk a nih vangin a hma aṭangin amah thlaktu tur hi buaipui ṭan a ni. IAEA-a Argentina ambassador Rafael Grossi leh agency coordinator Cornel Feruta-te chuan IAEA hotu dinhmun hi an chuh dawn tih a chiang tawh a, midang tan pawh chuh theih a la ni.

Share this Post

Login to comment

No Comments