Japan Parliament upper house inthlan­ah rorellai, prime minister Shinzo Abe-a party Liberal Democratic Party (LDP) leh a thawhpui, Komeito party chuan hneh­na an chang. Mahse ṭangrual pawl hian two-third majority erawh a nei pha lo. 

Upper house inthlan hi Pathianni khan neih a ni a, house-a seat awm zat 245 aṭangin seat 124-ah inthlan hi neih a ni. LDP leh a thawhpui hian seat 71-ah hnehna an chang a, eptu party lian ber, Constitutional Democratic Party (CDP) chuan seat 53 an la bawk. 

Prime minister Abe chuan nimin khan press conference neiin, voter-te chungah lawmthu a sawi. Inthlan dawnin mipuite hnenah an ram politics dinhmun ngelnghet taka awm nge buaina a awm zawk an duh tih thlang turin an ti a, mipuite chuan duhthlanna dik an siam ta a ni, a ti. 

Abe chuan term dawt leh atana an party hmalakna tur hrang hrangte a sawilang bawk a, heng zingah hian social security siamṭhat, a thlawna zirna pek, economy dinhmun tihchak leh kum upa lamte harsatna chinfel pui dan ngaihtuahte a tel a ni. 

Upper  house-a hnehna an chan leh tak avangin Abe-a kaihhruai sorkar hian Parliament in hnihah majority a nei ve ve a ni. Kum 2017 khan lower house inthlan hi neih a ni a, hneh takin an tling a ni. Mahse an ram danpui siamṭhatna tur atana pawimawh, House-a two-third majority erawh a nei pha lo a ni. 

Share this Post