La Liga president Javier Tebas chuan Barcelona-in Antoine Griezmann an lakluh dan chungchangah buaina awm thei niin a sawi a, mahse eng tiangin nge thil an kalpui dawn tih erawh a sawi chiang thei rih lo.

Barcelona hian July 12 khan Atletico Madrid aṭangin euro maktaduai 120 (£107m) sengin Griezmann hi an lalut. July 1 khan France forward 'buyout clause' hi euro maktaduai 200 aṭangin 120-ah a tla hniam. Mahse, Atletico Madrid chuan Barca leh Griezmann te hi July 1 hmaa inremna nei tawhah an puh a, an sum dawn tur zat dawng loah inngaiin an zualko.

Tebas chuan, "Atletico hian Griezmann leh Barcelona chungchanga lungawi lohna an thlen a, thil fel lo a awm a nih chuan Barca tana khel lo tura hrem theih a ni. La Liga chuan an chungchang hi ngun taka zirchiangin a chinfelna tur a siam ang," a ti.

Atletico Madrid chuan football thuneitu sang FIFA hnenah kum 2017 December thla khan inbiakna an nei tawh niin thu an thlen. Season hmasa nipui lai khan Barcelona sawmna hi Griezmann hian a lo hnar tawh ngei mai a, mahse Catalan club hian March thla aṭangin an lo be ru zui leh tawh niin an sawi.

Kum 28 mi Griezmann hian Barcelona tan season thar inbuatsaihna a nei mek. Thawhlehni khan Japan ramah Chelsea nen friendly match an khelh 

ṭumin bul ṭantu zingah tel mah se 2-1 in an chak lo.

Share this Post