Manny Pacquiao-a'n Pathianni zinga Keith Thurman a hneh hnu lawka a chona chhangletin Floyd Mayweather a ṭawng chhuak a, "Ka hnuaia hnathawktu i nihna ang chauhin i fight kha ka rawn en ve mai a ni," a ti!

Pacman hi Premier Boxing Champions (PBC) nen an thawkdun a, PBC hi Mayweather Promotions nen an thawk ho - hei hi Mayweather chuan Filipino boxer tih el nan 

a hmang. 

Kum 40 mi Pacquiao-a'n WBA (Super) welterweight title hlawh chhuakin Thurman a tukdawl a, a hmuna an inhnek en ve tu Mayweather a cho zui - American fighter hian instagram lamah thuziak hmangin a chona hi a chhanglet. 

Kum 2015-a Pacman a lo hneh tawhna chu sawi chhuakin, "I taksa, thinlung leh sum pai lamah nen lam ka hneh vek che. Round 12 inhnek chungin dollar maktaduai 10 i hlawh a, kei chuan minute thum chhungin dollar maktaduai kua ka hnek chhuak asin," a ti!

Mayweather hian December khan exhibition match-ah Tenshin Nasukawa chu second 139 chhung lekin a hneh a, dollar maktaduai kua a hlawh - Pacman hian Thurman a hneh khan dollar maktaduai 10 a hlawh thung a ni. 

Pacman a ngawi zui mai lo. Philippines lama senator hna chelhtu chuan, "Floyd min lo hrethiam teh. PBC-a ka contract neihlaiah hian i hming tel lo mah se ka ziah belh thei reng a nia," a ti a, a cho hle. 

Boxer pahnih hi hetianga boruak an neih thar leh hma daih khan inhnek leh tur anga sawi thawm a lo awm tawh. 

Mahse kar hmasa khan Mayweather Promotions chief executive Leonard Ellerbe chuan Mayweather chuan inhnek leh duhna a neih loh thu a lo sawi tawh a, Pacquiao trainer Freddie Roach chuan fight chu a thlen a rin loh thu a lo sawi tawh bawk. 

May 2015 khan fighter pahnih hi an lo inhmachhawn tawh a, a hunlaia boxing match sum tamna berah hian Mayweather hi 118-110, 116-112 leh 116-112-in judge pathumin chak zawkah an puang vek a ni.

Share this Post