Lalbiakliana Memorial MFA Super Cup-ah Chanmari FC chuan quarterfinal lut turin nimin khan third division club Lily Veng FC chu 16-0 in an sawp a, S. Malsawmtluanga'n a coaching career-a a match hmasa berah hnehna a chang.

Vawiin tlai dar 2:00 hian MPL club pahnih Mizoram Police leh Chawnpui FC te an inhmachhawn dawn a, MPL club inelna hmachhawn zingah quarterfinal thleng lo an awm dawn tihna a ni.

Chhun dar 12:00-ah I League club Aizawl FC-in Kolasib club Youngstar FC an hmachhawn ang a, chawhma dar 10:00-ah 

Hmunṭha club J&C FC leh Lengpui FC te an 

inkhel ang.

Goal 26 a lut

Mission Veng FC-in 6-0 in Thenzawl Dinthar FC an sawp a, Republic Veng khelmuala kum tluana inpuahchah ṭhin MSV FC-in an thawhrim rah an seng. Kanan FC-in Champhai club Sangtei FC hneh turin harsatna an tawk lo a, inkhel thunun chungin 4-0 in an chak.

Match hnuhnung berah Mama hnuaia Chanmari inkhel hmuh tur a awm a, an khingpui third division club an nem deuh avangin mipui beisei a pha lo. MPL club-in ṭan phat aṭangin a khat mawi tawkin goal an khung a, hun tawp thlenga an inthlahdah duh loh avangin goal 16 zet an khung. 

Chanmari tan hian Tuikual North tlangval Lalremruata'n goal nga a khung a, Laipuitlang tlangval Lalnunzama'n hattrick siamin Ramhlun South tlangval Lalremruata leh Armed Veng South tlangval Lalrammuanpuia ten goal hnih ve ve an khung a; David Laltlansanga, Rochhingpuia, Zakaria Lalhriatpuia leh Hmingthanmawia ten goal khat ṭheuh an khung.

En châkawm

MPL champion lai Aizawl FC tan Kolasib club Youngstar FC hi an harsat a rinawm lo a, chutihrualin I League club hian player naupang zawk an ziahluh hnem avangin an inkhel en a châkawm hle.

Mizoram Police hi season liam ta khan nasa takin an inla thar a, amaherawhchu kum hmasa lamah chuan an player lak tharten training an neih avangin an chhawr hleithei lo. Kuminah kim ṭhapin Lalbiaksanga Colney hoin bul an ṭan dawn a, eng ang chiaha ṭha nge tih Chawnpui hmaah fiahin an awm ang.

Chawnpui FC hi HC Zarzoliana'n a enkawl a, match hmasa berah Sihphir Venghlun 5-0 in an sawp tawh. Goal khungtu Lalnunmawia, R. Lalhmachhuana, Lalthanmawia Renthlei leh Vanlalthlamuana te chu tualchhung football-a tawnhriat nei ṭha vek an nih avangin Police tan pawh tawh an khirh khawp ang.

Khawi district-a mi nge?

Super Cup-ah hian team 21 an tel a, chung zinga panga chu MPL club Aizawl FC, Chawnpui FC, Chanmari FC, Electric Veng FC leh Mizoram Police te an ni. MPL club zingah champion lai Chhinga Veng, Ramhlun North leh FC Venghnuai te an tel lo.

Aizawl DFA aṭangin club pakua an awm. First division club panga Bethlehem Vengthlang FC, Dinthar FC, Kanan FC, Youngstar United FC (ITI Veng) leh Sihphir Venghlun FC; second division club pakhat Mission Veng FC bakah third division club Lily Veng FC, Lengpui FC leh Lushai FC te an tel.

Kolasib DFA, Champhai DFA leh Serchhip-ten club pahnih ṭheuh an thawh a, Mamit DFA-in club pakhat an thawh bawk. Kolasib 

aṭangin Bualpui FC leh Youngstar FC; Champhai 

aṭangin Sangtei FC leh LKS Hnahlan FC; Serchhip aṭangin  J&C FC (Hmunṭha) leh Thenzawl Dinthar FC; Mamit aṭangin Darlung GSA ten inelna an hmachhawn.

District DFA zingah Lunglei, Siaha leh Lawngtlai ten club an thawh lo.

Share this Post