Tui hleuh chak hmingthang Adam Peaty chuan a hming a chher chhunzawm zel, Britain tlangval hian Nilaini zan khan World Aquatics Championships-a 50m breaststroke huangah gold medal a la leh ta. World Championship gold medal pasarih ngawt a kawl khawm ta tihna a ni.

Korea lamah

Gwangju, South Korea-a inelna neihah kum 24 mi Peaty hian second 26.06 chhungin a hleuh thleng a, he inelna bikah hian 2015 leh 2017 khan gold medal a lo la tawh bawk. Amah hnaih bertu Felipe Lima aiin second 0.6 in a thleng hma zawk. Joao Gomes chuan second 26.69 chhunga thlengin pathumna dinhmun a luah bawk.

July 22, Thawhṭanni khan Peaty hian 100m breaststroke huangah gold medal a lo la tawh bawk a, semifinal-a an inel 

ṭum hian second 56.88 chhunga thlengin world record a lo siam tawh - second 57 hmang tling loa thleng thei hmasa ber a ni, final-ah erawh second 57.14 a hmang thung.

4x100m medley relay-ah pawh Peaty leh a ṭhiante - Georgia Davies, James Guy leh Freya Anderson te nen bronze medal an la tawh, he inelna bikah hi chuan Australia leh United States te an tluk lo thung.

Peaty a lawm

Hnehna ropui a chan hnuah Peaty chuan, "World title pasarih ka nei ta, 50m leh 100m bikah vawi thum ve ve pakhatna ka ni tling ta chiah bawk. Tunah chuan Pathiannia relay kan neih tur atan hahchawlhna hun ka nei ang," a ti.

South Korea rama inelna an neih chungchang sawi zuiin Peaty chuan, "He hmunah hian hnehna chan tumin ka rawn kal a, ka thil tum pakhat chu a hlawhtling ngei mai. Mahse, world record siam ka tum erawh a la thleng rih lo, kum 10 chhung vel infiamna khawvelah ka la awm turah ka ngai a, second 25.7 khum hun chu a la awm ka beisei," tiin 100m-ah pawh khawvela record 

ṭha ber neih a tum.

Inelna dang mipa 200m butterfly huangah Hungary tlang­val, kum 19 mi chauh Kristof Milak chuan gold medal a lak bakah world record a siam. Pakhatna ni tur hian 1:50.73 bak a mamawh lo a, American legend Michael Phelps-a'n record a lo siam tawh 1:51.51 chu a rawn khum a ni.

Tu nge Peaty?

28 December 1994 khan Uttoxeter, Staffordshire-ah Peaty hi a piang a, unau pali zinga a naupang ber a ni. A naupan tet lai chuan tui a hlau! A unaupain inbualna hmuna tui luan chhuahna aṭang chuan sangha hlauhawm (shark) a rawn kal dawn tiin a sawi ṭhaih a, tui a hlauh phah hle.

Mahse, a hnuah a ṭhiante nen tui chenna hmunah an kal a, a 

ṭhiante chuan 'pool'-ah tui hleuh puiin heta ṭang hian tui a hlauhna chu a ziaawm. Kum kua a tlin chuan Dove Valley Swimming Club a zawm a, a hawi kir tawh lo.

Tuna 100m breaststroke world record a siam nena chhutin khawvelah a ber nihna vawi 10 ngawt a nei tawh a, kum 24 mi chauh a la nih avangin harsatna dangin a tlakbuak a nih ngawt loh chuan sulhnu ropui leh ngaihnawm zawk a la hnutchhiah zel dawn niin a lang.

Share this Post