Scottish champion Celtic-in Champions League khel turin kawng dik an zawh zel a, second qualifying round first leg-ah Nomme Kalju chu 5-0 ngawtin an sawp. 

Celtic Park-a inkhelah hian Kristoffer Ajer, Ryan Christie (2), Leigh Griffiths leh Callum McGregor ten goal an khung a, Estonian club Kalju hian a chhanletna tur an nei lo. 

Scottish club-in goal nga an khung avangin third round lut chiang tura ngaih an ni tawh a, Israeli club lar Maccabi Tel-Aviv leh Cluj inkhela chak zawk chu third round-a an hmachhawn tur a ni ang. 

Romanian club Cluj hian first leg-ah 1-0 in hnehna an chang a, mahse mahni muala chak an nih avangin Maccabi lakah ngaih-

ṭhatna chi erawh a ni chuang lo. 

Mangṭha depression!

Nilaini zan inkhelin dang­lamna tak pakhat a nei a, chu chu Leigh Griffiths a ni. Celtic tana goal khat khungtu striker hi nikum khan depression vangin a buai a, hetihlaia Celtic boss Brendan Rodgers chuan a striker hi a chawlh rih tur thu a sawi. 

December hnua a vawi khat nan Scottish striker-in inkhel bul a ṭan - September hnua Celtic Park-a inkhel bul a ṭan leh hmasak ber a ni bawk. Griffiths-a'n depression tlansanin goal a khung leh ta!

November hnua a vawi khat nana goal khungtu striker hi goal a khung hnuah lawm avangin a ṭhingṭhi hnawk a, lawm avangin a hmai a hup a, a ṭah a chhuak tih hai rual a ni lo. 

Griffiths chuan, "Ka ball petin net a tawn puar pawp kha ka hmu a, khatihlaia ka lawmna kha sawifiah theih a ni lo. Ka faten in lamah ka inkhel an en tih ka hria a, a hmunah ka ṭhianten min ṭawiawm bawk - ka mittui ka dang zo lo ṭep a ni," a ti.

Griffiths lawmna goal

Celtic tan Kristoffer Ajer chuan minute 36-na lekah goal hmahruai a khung a, Christie chuan minute 44-naah an penalty hlawhchhuah chu a pet lut zui. 

First half hun pek belhah Celtic-in freekick an hlawh a, Griffiths hian yard 25 vela hla aṭangin mawi zetin a pet lut - kum hnih liam taah khan Griffiths hian England nena World Cup qualifier-a 2-2 a an ihnehtawk ṭumin freekick hmangin mawi zetin hetiang hian a lo khung tawh. 

Griffiths chuan, "Dik taka sawi chuan England laka ka goal khung nen khan a intluk tawk hle a ni. Ka ṭhiante leh he club-a thawk zawng zawngte hnenah lawmthu ka sawi a, anni awm lo se khelmualah hian min hmu leh tawh lo ang," a ti. 

Chawlhlawk hman a nih hnuah Celtic tan Christie chuan a goal hnihna a rawn khung a, McGregor chuan goal khat thawh ve leh bawkin Kalju lamin a chhanletna tur an nei lo.

Hmabak chu

Celtic hian first qualifying round aṭangin Champions League hi an khel ṭan a, first round-ah hian harsatna tawk loin Bosnian club Sarajevo chu inkhel pahnih belhkhawmah 5-2 in an hneh. 

Scottish club hian second round an paltlang ngei dawn niin a lang a, third round an khel leh ang - third round-ah hian hnehna an chang a nih pawhin an la tlang dawn lo cheu. 

Third round-ah hian an chak a nih chuan playoff an la khel leh dawn a, playoff-ah hian hnehna an chang a nih chuan group stage an inhlangkai ang - match tin hi home & away-a khelh a ni dawn. 

Champions League associa­tion ranking-ah Scotland chu 26-na a ni chauh a, hei vang hian an league champion Celtic pawhin qualifying first round aṭanga an khelh ṭan a ṭul phah a ni. 

Share this Post