Vanglaini - Quarterfinal-ah Sindhu leh Praneeth

KHAWTHLIR

Who's Who-ah Mizo

Republic HSS-a lecturer Lalhmingmawia Ralte chu Rifacimento International, New Delhi-in Asia Pacific Who's Who, 2019 (Volume Seventeenth) a buatsaihah a telh a, phek 336-naah langin, a chanchin tlangpui tarlan a ni. Lalhmingmawia Ralte hian National Award for Teacher pawh a lo dawng tawh a ni.

RMSA-a thawkte'n lawmthu an sawi

Mizoram RMSA Employee Welfare Association (MIREWA) chuan thuchhuah siamin, Centrally sponsored scheme hnuaia School Education department-a thawkte'n mumal zawka hlawh an lak ve theih tâk avangin lawmawm an tih thu an tarlang a, "Education Minister leh a hnuaia thawktute leh Finance-a thawkte chungah lawmthu kan sawi," an ti.

Êng awm dawn lo

Vawiin chawhma dar 10 aṭanga chhun dar 1 inkarah 33KV Tlangnuam Sub-Station-ah hna thawh a ni dawn a, chuvang chuan Aizawla veng

ṭhenkhatin kawlphetha an hmu dawn lo. Power hmu lo tur vengte chu - Tlangnuam, Kulikawn, Thakthing, Mission Veng, Mission Vengthlang, Khatla, Melthum, Saikhamakawn, Hlimen, Lawipu, Maubawk leh Reiek te an ni.

Thisen pe

Sakawrtuichhuna awm Border Security Force (BSF) 90 battalion chuan nimin khan Aizawl Civil Hospital tan thisen unit 23 an pe.

Sorkar ràlna hlan

July 17, 2019 tlaia ṭêk tlain a den hlum, Laldintluangi (33), Dilkawn chhungte hnenah Mizoram sorkarin nimin khan khuarel chhiatnaa thite râlna (ex-gratia) Rs. 4,00,000 a hlan. Ràlna hi Mizoram sorkar aiawhin Champhai District Disaster Management Authority chairman Dr Naveen Aggarwal, district bawrhsapin Laldintluangi pasal Lalramnghinga hnenah a hlân a ni.

Minister-in hawng

Samaritan Association for the Blind-te'n Durtlanga mitdelte hawrawp chhutna kháwl an bun thar, Braille Press chu nimin khan Social Welfare minister Dr K Beichhua'n a hawng. Samaritan Association for Blind hi kum 1990-ah R Thanga hoa din a ni a, May 1, 2001 khan Special Blind School an din a ni.

Damdawi-in endik

National Health Mission team-te chuan nimin khan Champhai District Hospital tlawhin, supportive supervision an nei a; nau neihna leh nau piang hlim enkawlnate tlawhin, staff nurse-te'n record an siam dan leh nau piang hlim an enkawl dante an enfiah. NHM team hi state programme officer Dr Lily Chhakchhuak-in a ho a ni.

Civil Service Drive

Kolasib College-a Public Administration department chuan, nimin khan an college-ah Career Guidance on Civil Service Drive an buatsaih a, resource person MCS officer pahnih - K Zorammuana leh Gaston Vanlalhriatpuia ten civil service exam hmachhawn tura thil pawimawhte an sawi.

DAWNTISEI

Quarterfinal-ah Sindhu leh Praneeth

Indian shuttler PV Sindhu leh B Sai Praneeth te chuan nimin khan an khingpui ve ve hnehin Japan Open-ah quarterfinal an invaw kai a, nomawi chawi loa season an hman lai tihtawp theihna hun ṭha an nei zel.

Musashino Forest Sports Plaza, Tokyo-a inkhelah Sindhu hian game hmasa ber a hloh hnuah khawtual nula Aya Ohori chu 11-21, 21-10, 21-13 in a hneh, Japanese player nen hian vawi riat an intawn tawhah hnehna a la chang vek a ni.

Mipa singles lamah Sai Praneeth chuan Kanta Tsuneyama 21-13, 21-16 a hnehin second round a paltlang ve bawk a, Indian tlangval hian quarterfinal-ah chuan Tommy Sugiarto a hmachhawn leh ang.

H.S. Prannoy-a'n Kidambi Srikanth hnehin bul ṭan fuh viau mah se a daih rei lo, nimin khan Denmark shuttler Rasmus Gemke lakah 9-21, 15-21 in a tlawm. Mipa doubles huangah Satwiksairaj Rankireddy leh Chirag Shetty te chuan Huang Kai Xiang leh Liu Cheang te ṭangdun chu 15-21, 21-11, 21-19 in an hneh thung.

Share this Post

Login to comment

No Comments