Manchester City manager Pep Guardiola chuan Bayern Munich nena sawi zawm Leroy Sane hmalam hun chu an kuta a awm loh thu a sawi a, Germany international hi transfer la tingaihnawm tur zinga mi a ni.

Premier League champion City hian Nilaini khan Kitchee chu 6-1 in an sawp a, Sane hian goal hnih a khung bakah David Silva, Raheem Sterling, Nabili Zoubdi Tuoaizi leh Iker Pozo La Rosa ten goal khat ṭheuh an khung.

Hong Kong Stadium-ah entu mipui 20,926 an pungkhawm a, tualchhung mipui hian Man City-in an tlawh hi remchangah lain 'Free Hong Kong' tih thupui hmangin China rorelna aṭanga chhuah an duh thu an au chhuahpui.

Cham rih la

Spanish manager Guardiola chuan, "Cham se kan duh a, a contract neih lai pawhsei tumin a agent dawr theih hun kan nghak. Kan kutah a awm lo. Thutlukna hi ama siam tur a ni a, a chhuak duh a nih chuan a thu a ni. A chhuak a nih erawh chuan pawi kan ti khawp ang," tiin Sane chu an duhlai a nih thu a sawi.

Khawthlang media ṭhenkhat chuan Man City-in Sane hi pound maktaduai 10.7 hu contract an zawrh dawn niin an tarlang a, kar khatah £200,000 a hlawh thei ang. Chutihrualin Bayern lamin an dawrna zat hi Man City phalna zat aiin a la tam nia sawi a ni.

Bavarians manager Niko Kovac chuan, "Sane hi kan duh tak a ni tih chu mi zawng zawngin an hria. Lakluh erawh a harsa a, hemi lam buaipuitute hi an thawkrim hle," tiin lakluh an duh thu a sawi ve thung.

Premier League transfer hi August 8, Ningani zan dar 9:30-ah a tawp dawn a, hemi hunah hian engkim a chiang chauh ang.

Inbuatsaihna ṭha lo

Manchester City-in season liam ta khan nomawi lian tham pathum Premier League, FA Cup leh League Cup an chawi a, season khuh hawnna Community Shield-ah Chelsea 2-0 in an hneh bawk.

Kumin hian Pep Guardiola hoten Community Shield-ah Liverpool an hmachhawn dawn a, Wembley Stadium-a an inkhelh hun tur hi August 4, Pathianni zan dar 7:30 a ni.

Hetihlai hian Man City erawh boruak danglam hlakna hmun Asia ramah an inkhel a, Kitchee nena an inkhelh hian 29C niin humidity level pawh  86% a tling pha. Pre season an neih ṭanna hmun China an thlen hun hi July 15 a nih laiin schedule tih sual vangin darkar 48-in an tlai a, an inpuahchahna kawngah harsatna an tawk bawk.

Man City hian July 27, Inrinni hian Japan-ah  J League club Yokohama F Marinos nen friendly match an la khel dawn. Pep Guardiola chuan, "Kan inpuahchahna a ṭha lo a, hetiang lo deuha inbuatsaih hi ka duh. A nih tur ang a thleng tawh a, kan pawm a ngai. Chuvangin kan hun neih hi ṭha taka kan hman a ngai," tiin thil thlen dan a sawi.

Share this Post