Vanglaini - Isner tan nomawi palina

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Isner tan nomawi palina

John Isner chuan Alexander Bublik hnehin Hall of Fame Open nomawi a chawi a, Newport-a grass court inelna lianah hian vawi li champion thei hmasa ber a ni.

American player hian tun season chhunga ATP Tour title hmasa ber la tur hian final bikah a khel ṭha hle a, round hmasa lamah set thum hmangin tlang hram ṭhin mah se seeded pasarihna Bublik lakah erawh set hloh loin a tlang.

Kum 34 mi Isner chuan, "2007 khan helai hmunah tho hian tennis ka khelh hun chhunga a hmasa ber atan ATP Tour title ka la, tunah season ka hman ṭhat loh kum takin a hmun ngaiah hlawhtlinna ka chang leh thei hi a lawmawm hle," a ti.

Champion Isner hian ATP Rankings point-ah 250 a hmuh belh bakah Rs 69,40,997 a dawng a, final-a chak lo zawk hian ranking point 150 hmuin Rs 37,53,037 a dawng ve thung bawk - player pahnih hi US Open inbuatsaihna BB&T Atlanta Open lamah an inlan zui leh nghal ang.

Share this Post

Login to comment

No Comments