Vanglaini - Ronaldo goal khung ni; De Ligt inlan hmasak ber Kane-a goal ropuiin a hliahkhuh vek

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Ronaldo goal khung ni; De Ligt inlan hmasak ber Kane-a goal ropuiin a hliahkhuh vek

Pathianni zan khan Juventus leh Tottenham Hotspur ten Singapore National Stadium-ah friendly match an khel a, 3-2 in English club an chak.

Italian champion tan defender sawi hlawh Matthijs de Ligt bakah Gianluigi Buffon pawh Juve kawr hain an inlan a, Ballon d'Or vawi nga dawng tawh Cristiano Ronaldo pawhin goal a khung.

Amaherawhchu thil thleng langsar tamna zan duhawmah Spurs chakna goal Harry Kane-a khung chu a langsar ber a, injury time minute thumnaah England captain hian halfway line pelh hret aṭangin a pet goal.

Goal nga chu

Minute 34-naah Erik Lamela-a'n Spurs goal hmasa ber a khung. Second half minute 56-naah Juventus tan Gonzalo Higuain-a'n siphurh sutna goal a khung a, minute linaah Ronaldo-a'n hmahruaina goal a khung leh bawk.

Spurs-in Italian champion an el tawk a, goal hlauhawm nei ve rengin minute 65-naah Lucas Moura-a'n a siphurh a sut. Injury time-ah Moura chuan mual laiah Juve defender ball chan lai tih per sakin hemi per hi Kane-a'n vawi khatah pet nghalin Juventus keeper Wojciech Szczesny tan dan theih a ni lo.

Ronaldo & Son an lawm

Mipuiin Juventus leh Tottenham an hlut a, Ronaldo leh Son Heung-min te an hlut zual bik. Player pahnihin ball an chan tawh chuan thawm a ring nghal em em zel.

Ronaldo-a'n mipui lawm zawng pholang turin ball chawh kual vel a thiam a, goal a khung miau avangin a 'goal celebrate' dan pawh a pholang thei a. A goal celebrate dan hi CYMA Football thlengin hmuh tur a awm a, entu mipui 50,443 pungkhawmin an duh zawng tak an hmu tiin a sawi theih ang.

Ka goal ropui zinga mi a ni - Kane

Tottenham Hotpsur tana goal ropui khungtu Harry Kane chuan, "Goalkeeper kha a chhuak tih ka hmu a, petna chance ka nei a nih chuan ka pet ang tihin rilru ka siam sa a, vanneih thlak takin a lut. Ka goal khung tawh zinga ropui ber zinga mi a ni," tiin Juventus laka a goal khung chungchang a sawi.

Kane-a'n chakna goal a khungna hi yard 45-a hla a ni a, hemi tlukpui leh hei aia goal ropui hmu tur a awm nual tawh. Spurs striker Kane goal hmutute hian David Beckham-a'n Wimbledon lama a khung an hre chhuak nghal a, Manchester United legend goal khung hmu hman lo pawhin Newcastle United lama Liverpool midfielder Xabi Alonso khung an hre hman tawh ang. An la hre lo chauh a ni chuan Charlie Adam-a'n Stoke City tana a khelh laia Chelsea lama an khung kha chu an hre hman tawh tur a ni.

Hei le, hla tak aṭanga goal khung langsar zual.

1. Vawi thum khung thei Rooney: March 2014 khan Manchester United jersey number 10 Rooney chuan West Ham lamah yard 48 aṭangin a volley goal a, Hammers keeper Adrian a talbuai hle.

Rooney hian November 2017 khan Everton jersey number 10 hain yard 61 aṭangin West Ham keeper Joe Hart-a pet chhuah chu a pet let nghal a, tuma khawih loin Hammers goal-ah a lut. English striker chuan, "Hei aia ṭha hian ka football khelh tawhah ka la pet lo," tiin a sawi hial.

Rooney hi a chawr chhuahna Everton aṭangin DC United-ah a kal zui a, MLS-ah pawh halfway line thlen hma aṭangin a khung. June 26, 2019 khan Orlando City nen an inkhelh ṭumin Rooney hian goalkeeper Brian Rowe rawn chhuak chu hmuin halfway line thlen hma yard 65-na aṭangin a pet goal.

2. Charlie Adam, Stoke City: April 2015 khan Stoke midfielder Charlie Adam chuan Jon Walters aṭanga a ball hmuh chu vawi hnih a khawih hnuin a ke vei lamin goal-ah a pet a, Chelsea keeper Thibault Courtois-a'n a dang thei lo. Sir Alex Ferguson pawhin Adam hi a ball pet thiam vangin a fak tawh a, kum 2009 khan Blackpool tana a khelh laiin Adam hian Accrington lamah hla tak aṭangin a khung tawh bawk.

Stoke tana Adam-a goal khung hi yard 66 niin outfield player zinga Premier League-a goal khung hla ber a ni a, comedian David Baddie chuan, "Pele pawhin hetiang hi a lo tum tawh a, a hlah thung," tiin twitter-ah thiam takin Adam hi a fak.

3. Maynor Figueroa, Wigan Athletic : December 2009 khan Wigan Athletic left back Maynor Figueroa chuan halfway line thlen hma hret aṭanga an freekick hmuh chu a pet thut a, yard 60 aṭanga ball kal hi Stoke City keeper Thomas Sorenson tan dan theih a ni lo.

4. Xabi Alonso, Liverpool: September 2006 khan Xabi Alonso chuan Newcastle player ball a chhuhsak hnuah yard 63 aṭangin risk a la a, goalkeeper Steve Harper-a'n a dang thei lo. Hetihlaia Reds manager Rafael Benítez chuan, "A zir nasa

ṭhin," tiin vanneih a nih loh thu a sawi a, Spanish midfielder hian 2006 FA Cup-a Luton an hneh ṭumin yard 70-na aṭangin a khung tawh bawk.

5. David Beckham, Manchester United: August 1996 thil thleng kha Beckham-a 'Beckham' ṭanna ang hialin a sawi theih. Selhurst Park-ah Beckham chuan yard 59-na aṭangin Wimbledon keeper Neil Sullivan a rep. Commentator John Motson chuan, "He goal hi an la sawi zui ang a, kum tam tak an la ennawn ang," tiin a sawi a, a thusawi dikna hi tun thlengin a lang chho zel a ni.

Share this Post

Login to comment

No Comments