Vanglaini - Nadal faktu Roger Federer

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Nadal faktu Roger Federer

Tennis legend Roger Federer chuan a vanglai leh tun thlenga a elpui ber Rafael Nadal chu mi ṭha tak a nih thu a sawi a, player a hmachhawn tawh zingah ani nena inkhelh chu nuam a tih ber thu a sawi bawk.

Federer leh Nadal te hi tennis player piang tawh zinga ropui bera chhal ngam an ni a, Swiss star hian Grand Slam nomawi 20 chawi tawhin - Nadal pawhin 18 zet a vaw chhuak tawh.

Inelna lian an khelh hnuhnung Wimbledon semifinal-ah khan an intawng a, inkhel inhnehtawk leh hmuhnawm takah Roger zawkin hnehna a chang - season khar hmain US Open an la hmabak a, an la intawng leh mai thei.

World number 3 Federer chuan, "Rafa hian thahrui a ngah em em a, mi chak tak a nih ang ai hian a rilru erawh a ngilnei hle thung. Tennis court chhung leh pawnah pawh mi ṭha tak a ni," a ti.

Swiss star hian player a hmachhawn tawh ho chungchang sawiin, "Inelna ka hmachhawn hnem tawh a, player hran hran pawh ka hneh hnem tawhin ngam loh pawh ka tawng nual tawh.

"Ka hmachhawn tawh zingah chuan Rafa nena inkhelh hi a nuam ka ti, a chhan chu ani hi chuan point zawng zawng hi hmuh tumin a bei a, chak duhna thinlung a neih len em avangin a khingpuite tan pawh inkhel hmuhnawm chhawpchhuah theihna remchang a siamsak," a ti.

Share this Post

Login to comment

No Comments