August thlaah Bundesliga an ṭan dawn a, inelna an ṭan thla hian Robert Lewandowski chuan kum 31 a tling tawh mai dawn. Bayern Munich striker hian a taksa dinhmun a ṭhat thu leh, hun rei tak inkhelh a duh thu a sawi.

Season hmasa khan Lewandowski hian league-ah goal 22 a khung a, tun hnai season li chhunga a vawi thum nan German football inelna sangah hian goal khung hnem ber a ni - Bungesliga goal a khung tawh belhkhawm chu 202 niin, season tharah a khung belh ang.

Lewandowski chuan, "Football khelh theih hun chhung hi a rei lo, rei tak ka inlan theih nan ka tih theih zawng zawng ka ti ang. Chumi tur chuan hrisel leh fit ṭha taka ka awm a pawimawh dawn a ni.

"A rei lo berah season li tal chu inelna sang hmachhawn ka la duh, tunah hian kum 31 tling mai tur ang pawhin ka la inngaihtuah lo," a ti. Season thar hi atan Bundesliga-a kum 10 a cham tlinna tur a ni ang.

Poland internatonal Lewy hi a nupui Anna chu nutrition specialist a ni a, amah mi invawng chi a nih bawk avangin a taksa a enkawl uluk hle. Pep Guardiola khan, "Ka player thawhpui tawh zinga professional ber," tih hialin a lo fak tawh.

Share this Post