Vanglaini - Neymar-a'n dawrtu a la nei rih lo

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Neymar-a'n dawrtu a la nei rih lo

Barcelona-a kir tur angin Neymar chanchin sawi ni reng mah se a club khelhna Paris Saint-Germain sporting director Leonardo chuan an player lakluh tuma dawrna engmah an la dawn loh thu a sawi.

Leonardo chuan, "Engmah thil danglam a awm lo. Neymar lei duha dawrna kan dawng rih lo. Kan hnenah contract a nei a, kan player a ni mek bawk," a ti.

Kar hmasa lawk khan khawthlang media te chuan Barcelona hian Neymar neih let duhin PSG an dawr niin an sawi a, mahse Leonardo thusawi

aṭanga teh erawh chuan dawrtu an awm rih lo niin a lang.

Dawrna chu

Sky Sports-in a tarlan danin pound maktaduai 200-a Neymar hralhtu Barcelona hian pound maktaduai 90-a an forward hlui hi lak let an duh a, pawisa bakah player an chhawp tel bawk.

Spanish champion hian Philippe Coutinho, Ousmane Dembele, Ivan Rakitic, Nelson Semedo, Malcom leh Samuel Umtiti zinga PSG player duh pahnih chu Neymar manah kal teltir an inhuam.

Mahse, Brazil international hlui Leonardo chuan, "Ka sawi nawn leh ang. Neymar hian tun thlengin dawrtu a nei rih lo a, tun hnai ni 10 chhungin engmah thil thleng danglam a awm lo," a ti.

Chhuah duh Neymar

Brazilian forward Neymar hian PSG hnenah chhuah a duh thu hi a hrilh tawh niin khawthlang media te chuan an tarlang a, coach Thomas Tuchel pawh Copa America khelh hma khan a hrilh tawh niin an sawi.

Khawthlang media-te titi tui tawh sa belhchhah turin Neymar-a'n PSG a pan theih nana buaipuitu agent Pini Zahavi chuan Paris khawpuiah a player hlim loh thu a sawi.

Zahavi chuan, "Neymar hi Paris khawpuiah hian a hlim tawk lo a ni," tiin French chanchinbu 'Journal du Dimanche' a hrilh a, Barca fans tan thu hriat nuam a ni.

Neymar a lang lo

PSG hotupa Leonardo ṭawng huai viau mah se kil lehlam a-

ṭangin chanchin thar a awm reng a, tun hnaia khawthlang media-ten an hmuh thar chu PSG-in intihlar nan Neymar an hmang ṭangkai lo!

Neymar hi PSG player zingah chuan hriat a hlawh lawr lak a, hei vang hian French club tan pawh khelmual pawn thlenga 'inzawrhna' ṭha tak a ni.

Mahse, PSG hian social media (twitter, instagram, facebook) lamah Neymar thlalak emaw a chanchin pholan tun hnaiah an nei lo a, hei thleng hian khawthlang media-te beng tivirtu a tling.

Neymar-a sulhnu

Brazilian forward hian Barcelona tan season li a khelh chhung khan match 186 a khelh sakah goal 105 a khung a, nomawi chawi theih ang a chawi kim bawk.

PSG a pan hnuah hliam vangin inlan tam tawk lo mah se season hnih chhungin match 58 a khel a, goal 51 a khung - an duh ber Champions League nomawi erawh a chawi thei rih lo.

French club chairman leh CEO Nasser Al-Khelaifi chuan, "He club tana an theihna zawng zawng hlan duh lo tan hmun a awm lo," tiin a lo sawi tawh.

Share this Post

Login to comment

No Comments