Vanglaini - MFA Super Cup-ah team 21 tel dawn

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

MFA Super Cup-ah team 21 tel dawn

Lalbiakliana Memorial MFA Super chu June 24 aṭangin khelh ṭan a ni dawn a, team 21 an inlan dawn.

MFA Super Cup-ah hian Chhinga Veng chu kum zawnin an champion a, tun ṭumah hian an inlan dawn lo. MFA thuneitute chuan champion lai tel theih loh chhan hi entry fee pek hun chhunga an pek hman loh vang a nih thu Vanglaini an hrilh.

Kumin Super Cup hi CYMA Football vangin ṭum dang angin team tel an tam lo. MPL club pariat aṭangin Chanmari FC, Aizawl FC, Mizoram Police FC, Electric Veng FC leh Chawnpui FC te an tel a, champion lai Chhingcows bakah Venghnuai FC leh Ramhlun North te an khel dawn lo.

Team 21 chauh tel mah se tualchhung football ngainatute tan chuan en châkawm tur a tam hle. S. Malsawmtluanga'n a coaching career chu MFA Super Cup aṭangin a ṭan dawn a, Chanmari a enkawl dawn.

Chhinga Veng vawi hnih champion puitu Lalsangzuala Hmar chuan Electric Veng FC a enkawl dawn a, tawnhriat nei aia player beiseiawm ziaklut hnem Aizawl FC leh tawnhriat nei ṭha Mizoram Police inkhel hmuh a châkawm bawk.

Share this Post

Login to comment

No Comments