Intlansiakna huangah India infiammiten beisei an phak ngai lo a, nikum thleng khan khawvel huap inelna (track & field) bikah gold medal la thei an awm ngai lo. 

Hima Das a rawn lan chinah erawh thawnthu ziah danglam a ni. Thingtlang loneitu fanu hian India chu khawvel hmuhah a pholang a, inelna lian zawkah medal la turin beiseina mitin a thlir mek.

Assam rawlthar hian July thla chhungin inelna hmun pangaah ngawt gold medal a la thei, a tlan thiamna ber 200m huangah medal pali lain - 400m bikah ṭum khat chu hnehna a chang bawk. 

India ram mi langsar tak takin lawmpuina leh chawimawina an hlan a, an zingah prime minister Narendra Modi leh cricket legend Sachin Tendulkar pawh an tel, mi ropuite lawmpuina thu hi Hima chuan a chhanglet.

Lawmpuina

Twitter kaltlangin PM Modi chuan, "Tun hnai ni reilote chhunga Hima Das chet dan hi India chuan a chhuang takzet a, inelna hrang hrang aṭanga gold medal panga a hlawhchhuah hian mitin a ti lawm. A hlawhtlinnaah ka lawmpui, a hma hun lo kal zel turah pawh duhsakna sang ber ka hlan," a ti.

Kum 19 mi Hima Das chuan Prime Minister lawmpuina chhangin, "Narendra Modi min duhsakna avangin ka lawm e, kan ram tana hlawhtlinna tam zawk dawng thei turin rim takin ka bei chhunzawm ang," tiin a sawi.

India president Ram Nath Kovind chuan, "Chawlhkar thum chhungin gold medal panga, tuna i hlawhtlinna hian 2020 Olympic Games atan rah ṭha chhuah mawlh rawh se, midang hmaah ropui takin tlan zel ang che," a ti. Cricketer hmingthang Sachin pawhin phone call hmangin a bia a, hmaichhana hmuh a chak thu a sawi tel bawk.

Indian athlete ṭhangduang Hima chuan, "Cricket lalpa Sachin Teldulkar, min fuih phurtu ni bawk hnen aṭangin phone call ka dawng a, ka tan chuan duhthusam leh suangtuahna a thleng dik ta. Sir, min duhsakna hlu tak avangin thinlung takin ka lawm, hmalam panin theihtawp ka chhuah zel ang," tiin Twitter kaltlangin Sachin a chhang.

Lo neitu fanu

Hima hi January 9, 2000 khan Assam ram chhunga thingtlang khaw pakhat Kandhulimari, Nagaon district-ah a piang. Lo neitu Ronjit leh Jonali Das te fa pali zinga naupang ber a ni, an chhawngkaw eizawnna ber chu buh chin a nih avangin Dasi-i hian a naupan lai chu buh hmunah a hmang tam ve hle.

A seilenna hmunin a zir bawk a, a nu leh pa eizawnna pawh kum naupangte ni chungin a khawih pui hma hle a ni. Das chuan, "Class X ka nih lai khan tractor khalh hi nuam ka ti thei hle a, chu bakah chuan bawng pa khalhin buh chinna tur lei ka let tawh ṭhin bawk," tiin a nu leh pa chu a theih ang tawka a puih ṭhin thu a sawi.

Mitin tan hringnun hi a awlsam vek lo, seilenna hmun a inân loh ang bawkin khawvel hmachhawn chhoh dan pawh a thuhmun thei lo. Amaherawhchu, siamtu hian mitin mai hi ṭhat bikna nei vekin min siam a, midang laka danglam veka siam kan ni. Mihringte 'talent' min pek ṭheuh hi a ti pung thiam chu an ding chhuak fo.

Das-i pawh hian infiamna kawng zawh turin talent a dawng a, naupangte a nih lai aṭangin lehkha zir ai mahin 

ṭhiante nena infiam chu nuam a tih ber a ni. A tirah a kawng tur hmu nghal mai lo mah se amaha theihna awm chu thup hlen theih a ni lo.

Nun inlet

Hmeichhe naupang kawlhrawng tak a ni a, school an kalna hmunah a kum rualpui mipa naupang hoin football an khelhnaah pawh Das hi a tel fo - a ti kimtu a ni satliah ngai bik lo. An khuaa hmeichhe team an dinah a tel a, striker niin goal khung pawh a thiam hle.

A football khel lai hmutu Physical Education trainer Shamsul Haque chuan Das-i tlan chakzia a hmuh fuh, ball pet ai chuan intlansiak huanga lut turin a duh, thurawn pein athletics-ah a seng lut. Intlansiak tenaua hming a chher hnuin Nagaon Sports Association hmelhriat a ni ta a, inter district competition a hmachhawnah gold medal pahnih a hlawh chhuak.

Football khelh a thiam a, an team-ah player langsar a ni phak. Mahse, footballer lansarh lohna rama cheng a nihzia a hai lo, a bikin hmeichhe tan kawng a thui lo niin a ngai. Das chuan, "Striker ka ni a, goal khung nuam ka tiin ka pet goal hnem thei hle. Mahse, hmeichhe football a la hnufual em avangin kal zel theih niin ka ngai lo," a ti.

Share this Post