Vanglaini - Meghalaya ram chinah Bangladesh sipai lut Kawng siam titawp turin vau

KHAWTHLIR

Who's Who-ah Mizo

Republic HSS-a lecturer Lalhmingmawia Ralte chu Rifacimento International, New Delhi-in Asia Pacific Who's Who, 2019 (Volume Seventeenth) a buatsaihah a telh a, phek 336-naah langin, a chanchin tlangpui tarlan a ni. Lalhmingmawia Ralte hian National Award for Teacher pawh a lo dawng tawh a ni.

RMSA-a thawkte'n lawmthu an sawi

Mizoram RMSA Employee Welfare Association (MIREWA) chuan thuchhuah siamin, Centrally sponsored scheme hnuaia School Education department-a thawkte'n mumal zawka hlawh an lak ve theih tâk avangin lawmawm an tih thu an tarlang a, "Education Minister leh a hnuaia thawktute leh Finance-a thawkte chungah lawmthu kan sawi," an ti.

Êng awm dawn lo

Vawiin chawhma dar 10 aṭanga chhun dar 1 inkarah 33KV Tlangnuam Sub-Station-ah hna thawh a ni dawn a, chuvang chuan Aizawla veng

ṭhenkhatin kawlphetha an hmu dawn lo. Power hmu lo tur vengte chu - Tlangnuam, Kulikawn, Thakthing, Mission Veng, Mission Vengthlang, Khatla, Melthum, Saikhamakawn, Hlimen, Lawipu, Maubawk leh Reiek te an ni.

Thisen pe

Sakawrtuichhuna awm Border Security Force (BSF) 90 battalion chuan nimin khan Aizawl Civil Hospital tan thisen unit 23 an pe.

Sorkar ràlna hlan

July 17, 2019 tlaia ṭêk tlain a den hlum, Laldintluangi (33), Dilkawn chhungte hnenah Mizoram sorkarin nimin khan khuarel chhiatnaa thite râlna (ex-gratia) Rs. 4,00,000 a hlan. Ràlna hi Mizoram sorkar aiawhin Champhai District Disaster Management Authority chairman Dr Naveen Aggarwal, district bawrhsapin Laldintluangi pasal Lalramnghinga hnenah a hlân a ni.

Minister-in hawng

Samaritan Association for the Blind-te'n Durtlanga mitdelte hawrawp chhutna kháwl an bun thar, Braille Press chu nimin khan Social Welfare minister Dr K Beichhua'n a hawng. Samaritan Association for Blind hi kum 1990-ah R Thanga hoa din a ni a, May 1, 2001 khan Special Blind School an din a ni.

Damdawi-in endik

National Health Mission team-te chuan nimin khan Champhai District Hospital tlawhin, supportive supervision an nei a; nau neihna leh nau piang hlim enkawlnate tlawhin, staff nurse-te'n record an siam dan leh nau piang hlim an enkawl dante an enfiah. NHM team hi state programme officer Dr Lily Chhakchhuak-in a ho a ni.

Civil Service Drive

Kolasib College-a Public Administration department chuan, nimin khan an college-ah Career Guidance on Civil Service Drive an buatsaih a, resource person MCS officer pahnih - K Zorammuana leh Gaston Vanlalhriatpuia ten civil service exam hmachhawn tura thil pawimawhte an sawi.

DAWNTISEI

Meghalaya ram chinah Bangladesh sipai lut Kawng siam titawp turin vau

Bangladesh sipai, Border Guards Bangladesh (BGB) te chu Meghalaya ram chinah lutin, ramri bul khuaa chengte hnenah West Jaintia Hills district-a international border bula kawng an siam chu titawp turin an vau.

Border Security Force (BSF) thupuangtu chuan Bangladesh sipaite chetdan chungchang hi commandant level officer-in a chhui chiang mek tih a sawi.

Ramri bula awm, Muktapur khuaa cheng leh contractor, B. Buam chuan BGP sipai pathumte chuan kawng an siam chu international border aṭanga yard 150 huamchhunga awm a ni tih sawiin, dan an bawhchhia tih an hrilh niin a sawi. Mahse Buam chuan he kawng siamna tur hian kum 2011 khan India leh Bangladesh chuan inremna an lo siam tawh tih a sawi thung.

Indo-Bangladesh border bula chengte buaipuitu, Coordination Committee on International Border (CCIB) chuan he thil thleng hi an dem thu an sawi a, Bangladesh sipaite chetdan pawh chhui chian an phut bawk a ni.

Share this Post

Login to comment

No Comments