Fur ruah sur nasa in Assam hmun hrang hrangah chhiatna a thlen a, tuilianin a tihchhiatte siam ṭhat lehna tur atan hian cheng vaibelchhe 1,000 a ngai dawn tih Assam finance minister Himanta Biswa Sharma chuan a sawi. 

Assam tuilian vang hian mi 75 in nunna an chan tawh a,  mi 2,00,525 vel hmun himah thiarchhuah an ni tawh bawk.

Minister Sarma chuan thuthar thehdarhtute hnenah Nilaini khan tuilianin state chhunga thil a tihchhiat chungchang ngaihtuahin high-level-meeting an nei tih a sawi. Meeting-ah hian Water Resources Minister Keshab Mahanta, Agriculture Minister Atul Bora, PHE Minister Rihon Daimary, Forest Minister Parimal Suklabaidya leh Revenue Minister (State) Bhabesh Kalita-te bakah sorkar department hrang hrang hotute an tel.

Meeting ah hian tuilianin a tihchhiatte thlirletna neih a ni a, PWD, PHE, WRD leh department hrang hrangten an huam chin siam ṭhat nana an mamawh ang zat ṭheuhte sawiin, state pumpuia tuilianin a tihchhiatte siam ṭhat nan cheng vaibelchhe 1000 an ruahman. Sorkar chuan vawiina  Assembly inkhawm an neih tura house pawmpuina la turin  'suplementary demand (additional budgetary provision)' ah a dah nghal a ni. 

Assam tuilian vang hian nun­phung a khaihlak nasa hle a, khaw 2,933-a cheng  mi  34,82,170 vel chu tuilian hian a tibuai. Tuilian tuarte tan hian relief camp 826 siam a ni tawh bawk.  NDRF, SDRF, Civil ad­mi­nistration leh sipaite chuan tualchhung mite puihna nen harsatna tawkte chhanchhuah leh chhawmdawl hna an thawk mek. Northeast Frontier Railway (NFR) chuan ruahsurin rel tlan dan a tihkhaihlak chu a ziaawm ṭan tawh tih sawiin hmun hla kal tur relte pawh speed limit chin siamin an zin chhuak leh tawh tih a sawi. BSNL service chu tuilian vang hian tihtawp a la ni reng a, hei hi mipuiin an duhlo hle.

Tripura West Lok Sabha MP Pratima Bhowmim chuan a MP hlawh aṭangin Assam tuilian tuarte ṭanpuina turin cheng nuai  khat a pe. Bhowmik hi Tripura-a BJP general secretary 

ṭanglai a ni. Ṭanpuina sum hi New Delhi-a Assam sorkar official kutah a hlan a ni.

Share this Post