Vanglaini - Nagaland governor atana RN Ravi ruat vangin lawm

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Nagaland governor atana RN Ravi ruat vangin lawm

Naga People’s Front (NPF) chuan Pathianni khan Nagaland governor atana RN Ravi ruat a ni chu an lawm thu an sawi.

RN Ravi hi Naga politics buaina chinfelna tura August 2014 aṭanga inbiakna kalpuinaah khan palai a ni a, hemi a nih avang hian NPF chuan beiseina sang tak neiin, an state politics buaina chinfel sak theitu turah an ngai a ni.

Nagaland-a eptu party chuan thuchhuah an siamah Ravi chungah chuan beiseina sang tak an nei tih an tarlang. Naga politics buaina chungchanga hnathawktu ngei mai ruat a nih avang hian sorkar laipui chungah pawh an lawm hle tih an tarlang bawk. Sorkar laipui chungah chuan beiseina sang tak an neih thu tarlang zuiin, Naga politics buaina chinfelna atana inbiakna kalpui chu a rang thei ang bera a hmawr bawk tura an beisei thu an tarlang a ni.

NPF chuan Ravi appointment thar chuan remna zawnga inbiakna chu a tibahlah tur a ni lo, an ti bawk.

RN Ravi hi sorkar laipui leh NSCN-IM-ten August 3, 2015-a Framework Agreement an ziah khan sorkar laipui aiawha hming ziaktu zingah a tel a, Nagaland governor atana ruat a ni leh pawh hi mi tam tak mak tih a hlawh hle.

Naga political issue hi kum tam tak chhung chinfel lohin a awm tawh a, remna zawnga inbiakna pawh an nei tam tawh hle. Mahse hetichung hian inremna mumal an la siam hleithei lo a, 2015-ah daih tawh khan Framework Agreement pawh hi siam tawh mah se a hmawr an la bawk thei lo.

NSCN-IM-te hian Naga-te state khata an awmkhawmna tur Nagalim(greater Nagaland) an ngiat a ni.

Share this Post

Login to comment

No Comments