Vanglaini - Manipur-ah zirtirtuten lungawi lohna lantir

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

Manipur-ah zirtirtuten lungawi lohna lantir

Manipur sorkarin sorkar hnathawkte hlawh ennawnna Zirtawpni aṭanga a hman ṭan - Manipur Services (Revision of Pay) Rules 2019-ah zirtirtute hlawh tihhniam a ni a, hei vang hian Pathianni khan Imphal-a Keishampat-ah zirtirtu intelkhawm chuan lungawi lohna an lantir.

ROP 2019 hnuaiah hian 7th Pay chu Manipur-ah hman ni tawh mah se sorkar sikul zirtirtute hlawh chu 5th Pay Commission nena inangin an siam a ni. Hei hi duh loin Joint Teachers’ Forum (Primary/Graduate /Lecturer) chuan Pathianni khan lungawi lohna lantirin sit-in-protest an nei.

Joint Teachers Forum convener, M Jadumani chuan thuthar thehdarhtute hnenah zirtirtute chu sorkar chuan a ti mualpho tih a sawi. Hlawh tihhniam hian zirtirtute hnathawhna kawngah nasa takin nghawng ṭha lo a nei thei a ni, a ti.

Sorkar chuan scheme hrang hrang hmangin sorkar school-te ti changtlung viau mah se zirtirtute erawh chu a ti beidawngin an phurna a lak bo sak tih a sawi bawk.

Share this Post

Login to comment

No Comments