Vanglaini - ADB-in Tripura power project atan Rs vbc 1,540 a pe dawn

KHAWTHLIR

Hmalak tum dan inhrilhfiah

January 1, 2016 aṭanga August 31, 2018 inkar chhunga Serchhip district aṭanga sorkar hnathawk pension a chhuakte chu nimin khan Serchhip Sub-Hqrs. YMA Office conference hall-ah inhmukhawmin 7th Pay anga Pension benefit an lak theihna tura Court-ah kala hmalak an tum chungchang inhrilhfiahna neih a ni. He hunah Confined Pensioners Committee (CPC) chu Serchhip district huap tura din nghal niin hruaitu tur pawh an insiam nghal.

Self Determination Day an hmang

Mizo hnam aiawhten kum 73 kal ta, July 20, 1946-a ‘Mahnia ro inrel' an lo rêl tawh hriatreng nan July 20, Inrinni khan Sikulsen (Boys ME School), Sikulpuikawn tualah hun hman a ni a, parva nupa leh balloon 73 chhuah a ni.

Thisen pe

Champhai Venglai Branch KṬP chuan July 20, Inrinni khan an Kohhran Hall-ah blood donation camp an huaihawt a, Champhai District Hospital tan thisen unit 37 an pe a, a petute mipa 28 leh hmeichhia pakua an ni.

Pre-recruitment

Aizawla Assam Rifles-te chuan AR 23 Sector/IGAR (East) kaihhruaina hnuaiah kumin June 17 aṭanga July 20 chhung khan sipai ṭang duh Mizo ṭhalai mipa leh hmeichhiate tan Aizawlah pre-recruitment training an buatsaih. Training-ah hian Mizo mipa 60 leh hmeichhia 40 an telin, physical leh academic lama pawimawhte zirtir an ni a; November 18-21, 2019 chhunga Aizawla Army/Assam Rifles recruitment rally neih tur leh hmeichhe tan bik September 9-10, 2019 chhunga 58 GTC, Shillong-a recruitment rally neih tur atana inbuatsaihna a ni.

Zirtirtute Ni

School Education minister leh State Level Working Committee chairman Lalchhandama Ralte hoin nimin khan a pisaah kumin September 5-a Zirtirtute Ni hman dan tur an rêl a; zirtirtu damlo kanna zat chu tihpun an remti. Meeting-a rel a nih dan chuan zirtirtu damlo harsa zualte tualchhung damdawi-ina inenkawlna ṭanpui nan Rs. 7,000 chu Rs. 10,000-ah tihpuna a ni a, phaia kalpui ngaite

ṭanpuina Rs. 10,000 pek ṭhin chu Rs. 15,000-ah tihpun a ni.

DAWNTISEI

ADB-in Tripura power project atan Rs vbc 1,540 a pe dawn

Asian Development Bank (ADB) chuan Tripura power project atan cheng vaibelchhe 1,530 a pe dawn.

Tripura State Electricity Corporation Limited (TSECL) chairman leh managing director Muhari Sopanrao Kele chuan ADB hian Tripura power generation upgradation leh distribution project, cheng vaibelchhe 1,925 senga thawh tur atan hian senso 80% a rawn pe dawn tih a sawi a, a bak cheng vaibelchhe 385 chu state sorkarin a tum thung ang.

India rama power distributor sector-a expert leh analyst, Kele chuan ADB-funded project hnuaiah hian Tripura khawthlang lam, Rokhia-a gas-based power plant-a power siam zat chu 63 MW aṭangin 120 MW-ah tihpun a ni dawn tih a sawi a, hemi atana sum sen tur chu cheng vaibelchhe 700 a nih thu a sawi.

Kele chuan, "Tripura chhim lama Gumti Hydro Electric Project-a transmission, distribution atan leh infrastructure cheiṭhat leh tihchangtlunna atan cheng vaibelchhe 1,226 vel sen a ni ang," a ti bawk.

June thla khan ADB hian Tripura district headquarters pasarih-a infrastructure development project thawhnaah sum lama puihna pek a lo remti tawh a ni.

Hetihlai hian sorkar hnuaia mi, Power Grid Corporation of India Limited (PGCIL) chuan World Bank sum hmangin state chhungah power infrastructure tihchangtlunna tur, cheng vaibelchhe 1,372 project chu a kalpui mek bawk.

Share this Post

Login to comment

No Comments