Mizoram Pradesh Congress Committee (MPCC) president Lal Thanhawla chuan nimin khan MPCC-in hruaitu thar an thlannaah thu a sawi a, Mizoramin tun anga ram hruaitu, eirûk thubuai lian nei a la neih ngai loh thu a sawi.

Lal Thanhawla chuan, "MNF sorkar hotu lian pahnihin eirûk thubuai lian tak an nei a, an thubuai neihte hi evidence engkim awm sa a nih avangin court-in a chinfel rual ruala jail táng mai tur an ni," a ti a; amah pawh MNF sorkarin finfiahna awm loin thubuai an siamsak a, jail-a tàntir tumin kum 10 chhung an beih pawhin a lamah Pathian a ṭan avang­in a thubuaiah a fihlîm tih a sawi.

Congress party President chuan, "Kum 10 zet min veh chung pawhin ka eirukna pakhat tê pawh an hre lo a, nâia khat pawh ka eiru lo rêng bawk a ni," a ti.

Chief minister Zoramthanga erawh chu thuneitute'n an hrilh ru lâwk vek chung pawhin ACB-in pawisa fai cheng vbc. 9.6 an mansak nia sawiin Hawla chuan, "Court-in dik taka ro a rél a nih chuan jail táng mai tur a ni. MNF sorkar hian rei a daih dawn lo a, Congress bak chu sorkar leh tur kan awm lo. Congress hi kan tla zawi lo a, sorkarna siam leh thuai thei kan ni tih inhre chung­in kan tla tang hrâ mai a ni," a ti.

Lal Thanhawla chuan, MPCC chu central lama Congress-ah an innghat lo nia sawiin, "Kan innghah­na chu engkim ti thei Pathianah a ni. Pathianin Mizoram hmasawn nan Congress party bâk a hmang ngai lo," a ti a; Mizorama hmasawnna lian tham zawng zawng, zirna-in sang leh damdawi-in lian zawng zawng chu Pathian zara Congress sorkarin an tihhlawhtlin vek niin a sawi bawk.

Nimina MPCC inthlanah hian Executive Committee member tur mi 60 an thlang nghal a, mipa 50 leh hmeichhia 10 thlan chhuah a ni.

 Aizawl District Congress Committee hruaitu atana chuhtu awm loa thlan tlinte an puang a; chu'ngte chu president-ah Vanlalzuiliana, vice president-ah Lalhuapzauva leh treasurer-ah Lalhmingthanga Pachuau-te an ni. ADCC Executive member 45-te chuhtu dang awm loa an tlin thu an puang nghal bawk a ni.

Share this Post