Food, Civil Supplies and Consumer Affairs (FCSCA) minister K Lalrinliana chuan nimin khan Mualkhang dáia NH-54 kawngpui hnawh pingtu leimin a tlawh. Minister chuan, leimin zau takin Mizoram mamawh tinréng lâk luhna ber kawngpui chu hnawh ping rih mah se, ei leh barah harsatna a awm a rin loh thu a sawi.

Supply Minister chuan, leimin vangin ei leh bar lamah din­hmun harsa lutuka din a hlauhawm lo tih sawiin, "Kudam hrang hrangah buhfai dah khâwl kan ngah tâwk a, mipui ni tin mamawh pawh a theih ang anga lak luh zel a ni. Ei leh barah harsat a awm kan ring lo," a ti.

K Lalrinliana hi PWD superintending engineer (highways) C Lalchhuana leh officer dangte'n an lo dawngsawng a; PWD hotute chuan, kawng tih­tlang hun tur sawi mai a harsat thu te, khaw awm danin a zir chuan tun kar chhungin tihtlang hman an inrin thu te, kawng ko-ah min mai hlauhthawnawm a tam avangin hna thawh chak a har thu leh zanah chuan hna an thawh ngam loh thute an lo hrilh.

FCSCA Minister hian Mualkhang Gas Bottling Plant a tlawh nghal a, chief plant mana­ger Z Lhungdim-a'n a lo dawngsawng. Minister hian harsatna an tâwk a nih chuan Mizoram sorkarin puih a inpeih reng tih a hrilh.

K Lalrinliana chuan, Mualkhang Gas Bottling Plant-ah ni tin bullet truck hmangin phai aṭangin gas a thleng thei tih sawiin, "A sem darh lam pawh tláng kawng aṭangin kalpui zel a ni a, harsatna lian tham kan tawh kan ring lo a, gas hi a sem dan ngaiin kalpui zel theih beisei a ni," a ti.

Share this Post