Mizoram Public Service Commission (MPSC) chairman Rev. Zosangliana Colney chuan, Mizoram sorkara thawk tur group B (non gazetted) post recruitment MPSC-in a kalpui mekte an kuta awm zui turin Chief Minister-in ti mah se, government gazette hmangin MPSC (Limitation of Functions) Regulation Amendment tihdanglam a nih tawh avangin an kutah a awm zui ngawt theih loh thu a sawi.

MPSC-in group B (non gazetted) post lak hna an thawh mek July 22, 2019-a tihtawp a nih chungchangah MPSC Chairman chuan, sorkar thu an zah vang leh an zawm vanga tih a nih thu a sawi a, "CM-in lo ti leh rawh u, a tih vanga tih leh ngawt theih a ni lo. Cabinet resolution bawhzuia MPSC (Limitation of Functions) Regulation Amendment sorkar gazette-a chhuah thlap a ni tawh a, he amendment hi tihdanglam leh a ngai. Govt. gazette chu executive order maia tih theih a ni lo a, legislative order ngai chi a nih hmel," a ti. 

Mizoram Council of Ministers meeting, June 10, 2019-a neih chuan Mizoram sorkar hnathawk group B (non-gazetted) chin hnuai lam lak hna chu MPSC-in buaipui tawh lo se, an ti a. June 21, 2019-a government gazette hmangin notification chhuah a ni a, chu notification chu an tihchhuah ní aṭanga hman nghal tura tih a ni bawk.

MPSC hotute sawi danin, Cabinet thu­tlukna leh chumi anga June 21, 2019-a government gazette angin MPSC chuan group-B chin a lak ṭhin leh lak tura a kalpui mekte chu a titawp ta a ni.

MPSC-in goup B (non gazetted) post lakna an kalpui mek sorkar thuchhuak a awm vanga July 22, 2019-a an tihtawpte chu - Health & Family Welfare department-a thawk tur staff nurse 25 lakna te, Home (Forensic) department-a thawk tur UDC post pakhat lakna leh, AH&Vety department-a thawk tur computer operator laknate a ni.

Hengah hian written exam neih vek tawh a ni. AH&Vety computer operator atana personal interview neih hun atan ruahman July 24 (nimin kha) ruat a ni a, Health & Family Welfare-a staff nurse 25 lak turah personal interview hun atan August 8-9, 2019 rua­hman a ni bawk.

MPSC-in group B (non gazetted) recruitment a khawih mekte July 22, 2019-a tihtawp a nih chungchang hi chief minister Zoramthanga chuan a hriatpui loh thu te, MPSC chu autonomous body a nih avangin sorkar a inrawlh vak theih loh thu te, group B (non gazetted) recruitment kal lai chu MPSC-in an khawih zel tur thute July 23, Thawhlehni khan MZP hruaitute hnenah a lo sawi tawh a ni.

Share this Post