Chief minister Zoram­thanga chuan nimin khan Seṭhàwna ruihhlo ngaite enkawlna hmun chei ṭhat tura ruahman mek a tlawh a; thu sawiin, India rama ruihhlo ngaite enkawlna hmun lian ber din an tum thu a sawi.

Seṭhawna inkhawm tâwi buatsaihah Chief Minister chuan, ruihhlo do turin theihtawp an chhuah tih a sawi a, "Ruihhlo do piah lamah ruihhlo vanga harsatna tâwkte tana chhanchhuahna hmun siam hi kan tum ber pakhat a ni. Ruihhlo ngaite enkawlna lamah theihtawp chhuah kan tum. Seṭhâwn hmunah hian a tam thei ang ruihhlo ngai dam duhte dah kan tum," a ti.

CM Zoramthanga chuan, ruihhlo chu titâwp thei lo mah se, tihtlem an tum thu sawiin, "Demand tam lutuk hi titawp thei ila kan zia ang. District dangah pawh ruihhlo ngaite enkawlna a ṭul anga din zel kan tum," a ti a; ruihhlo ngaite enkawl hna chu emergency-a ngaiin a ṭul anga an thawh tur thu a sawi.

Chief Minister chuan, "India ram hmun dang 

aṭanga pawha an pan khawm tur khawpa ṭha din kan tum a ni," a ti.

Social Welfare minister Dr K Beichhua chuan, "Vawiin hi Zoram tan ni chhinchhiahtlak a ni. Ruihhlo vangin hma kan sâwn lo a, a lungchhiatthlak hle a ni," a ti a; sorkarin ruihhlo do hna chu theihtawp a chhuah chhunzawm zel tur thu a sawi.

Central YMA vice president R Lalngheta pawhin thu sawiin, ruihhlo ngaite enkawlna tur buaipuina atana hnatlan a ngai a nih chuan, YMA chu an tlanchhiat a rin loh thu a sawi a, "YMA chu a 

ṭul ang ang kan inhuam ang. Ruihhlo vanga harsatna tâwk mekte chhan tura pên hi a pawimawh a ni," a ti.

Thusawitu dang, Mizoram Kohhran Hruaitu Conmmittee chairman Rev. R Lalhmingthanga chuan, ruihhlo ngaite enkawl turin theihtawp an chhuah zel tur thu a sawi bawk.

Chief Minister leh sorkar official-te chuan Seṭhawn bakah, ruihhlo ngaite enkawlna hmun tur siam dan tur Thingdawla mi pawh an enho nghal a ni.

Share this Post