Mizoram sorkarin muster roll-a thawk tur primary school zirtirtu 817 leh middle school zirtirtu 64 a lak turah Mizoram Teacher Eligibility Test (MTET)-in mark 10 a pu dawn a, personal interview bakah, intelligence quotient (IQ) test neih a ni tel bawk ang.

P/S leh M/S zirtirtu 881 lak turah hian  Mizoram sorkarin personal interview chauh hmanga lak a tum a, MTET pawh tehnaah a lang lo.

 Zirtirtu lak tum dan hi Mizo Students’ Union (MSU) chuan duh loin, July 23, Thawhlehni chhun khan School Education minister Lalchhandama Ralte hnenah written exam buatsaih turin an ngen a; mahse, thu mum nei loin an inṭha ṭhen. Hei vang hian MSU chuan nimin khan Aizawl Press Club-ah press conference neih an tum a ni.

An rawtna leh duh dan an thlente School Education Minister-ah awmzia a neih loh avangin MSU hruaitute chuan Thawhlehni tlai khan chief minister Zoramthanga hnenah an thlen leh bawk.

Press conference nei tura ruahmanna an siam mek laiin MSU hruaitute chu nimin zing khan School Education minister Lalchhandama Ralte-in lénga a sâwm angin an inkâwm leh a; MSU duh dan leh rawtnate an sawiho hnuah, kar leh maiah personal interview neih tura tih a nih tawh avangin written exam buatsaih chu tih ngaihna a awm tawh loah an ngai a, thil dangin inremna an siam ta a ni.

MSU tarlan danin, School Education department-in inremna an ziah dan chuan, P/S leh M/S zirtirtu 881 lak turah personal interview-ah full mark 100 a awm ang a, full mark aṭangin mark pu/keng nghal tur thil chi thum a awm ang.

Zirtirtu laknaa mark pu nghal turte chu - MTET-in mark 10, intelligence quotient (IQ) test-in mark 20 leh, locality (tualchhung mi)-in mark 20-te a ni. A bak mark 50 chu personal interview-in a keng dawn a ni.

Hun lo kal leh zel turah zirtirtu a hlâwma lâk a awm leh a nih chuan written exam neih ṭhin tawh turin an inrem bawk.

Zirtirtu lâk tura inremnaah hian School Education department aiawhin secretary Esther Lalruatkimi leh MSU aiawhin president Vanlalliana Khiangte ten hming an ziak a ni.

MSU chuan, Mizoram sokara School Education department-in written test nei loa interview chauh hmanga zirtirtu a lâk chuan ṭhalaite rilruah nghawng ṭha lo a neih an hlauh thu an tarlang a, "Ṭhalaite competitive mindset a tihchhiat kan hlauh avangin written test hmang ngeiin hna hi lak ni se kan ti a ni," an ti.

MSU chuan, Mizoram sorkar hnuaia thawk tur group B (non gazetted) post hrang hrang la tura sorkarin din a tum, Mizoram Subordinate Service Selection Board (MSSSB)-in a tak taka hna a thawh hma chuan group B (non gazetted) recruitment chu MPSC-in khawih chhunzawm se an duh thu, July 23 khan Chief Minister hnen an thlen tih an tarlang.

"Chief Minister zahawm takin kan ngennate min ngaih pawimawhsakin, Chief Secretary charge latu min biaksak nghal a, July 25, 2019-ah order chhuah hman a nih tur thu min hrilh. Ṭhalai hna zawng mekte dinhmun min hriatsak a, hma min laksak nghal avangin Chief Minister hnenah lawmthu kan sawi a ni," an ti.

MSU tarlan danin, MPSC-in group B (non gazetted) lakna a buaipui mekte chu - written exam result chhuak tawh interview tur post pathum, advertisement 2017-18 & 2018-19 written exam tawh result la chhuak lo post 11, advertisement 2017-18 & 2018-19 a chhuak tawh leh exam hun bithliah (fixed) tawh post pakhat, advertisement 2018-19 a chhuah tawh leh exam hun la ruat loh post 19, advertisement 2019/20-a chhuah tawh leh exam hun la tihfel loh post pali leh, sorkar aṭanga proposal dawn tawh, mahse la khawih loh post 15-te a ni.

Share this Post